Ռուսաստանի նորընտիր նախագահ Վլադիմիր Պուտինը ստորագրեց հրամանագիր արտաքին քաղաքական դոկտրինի մասին, որտեղ սակայն ոչինչ չկա Հայաստանի,Ղարաբաղի, Ադրբեջանի մասին, փոխարենը կետեր կան Հարավային Օսեթիայի, Աբխազիայի եւ Մերձդնեստրի մասին: Այս մասին, այսօր` մայիսի 8-ին, լրագրողների հետ հանդիպման ժամանակ նշեց «Նոր ժամանակներ» կուսակցության առաջնորդ Արամ Կարապետյանը:
«Մենք ընդհանրապես կարծես գոյություն չունենք: Արդյունքում մենք ունենում ենք մեզ վերաբերող խնդիրների վերաբերյալ մի կողմ քաշված Ռուսաստան, մյուս կողմից ակտիվ Թուրքիա, որն ուզում է ԵԱՀԿ Մինսկի խմբի նախագահ դառնալ: Եվ ունենում ենք լավ զինված, բայց իրեն վատ պահող Ադրբեջան եւ դեռ Իրանի հարցն էլ գումարվում է սրան»,-ասաց նա:
Այս ամենի գինն, ըստ ՆԺԿ ղեկավարի, հետեւյալն է. «հայ-թուրքական համահարթեցում, բացել սահմանն ամեն գնով, թուրքական ներդրումների ապահովում Հայաստան, Թուրքիայի կողմից Հայաստանից էլեկտրաէնեգիայի գնումից սկսած մինչեւ ռուսական երկաթգծերի բացում, որպեսզի կարողանան աշխատել: Այդ թվում նաեւ էրդողանի խոստումները, որը շուտով երեւի հայտնի կդառնա, որ պատրաստ է Հայաստանում 3-4 մլրդ դոլար ներդնել»:
Լուսանկարը` Սոնա Բարսեղյանի