Առայժմ վաղ է խոսել Հայաստանի տարածքում ընթացիկ տարվա աշնանը նախատեսված ՀԱՊԿ-ի ԱԱՀՈՒ զորավարժություններում ստորաբաժանումների թվի եւ կազմի մասին: Այդ մասին հայտարարել է ՀԱՊԿ-ի գլխավոր քարտուղար Նիկոլայ Բորդյուժան մայիսի 21-ի հեռուստակամուրջի ընթացքում:
Նիկոլայ Բորդյուժան հիշեցրել է, որ արդեն տեղի են ունեցել առաջին գրասենյակային բանակցությունները, քննարկվել է զորավարժությունների սցենարը, մասնակիցների կազմը, այլ մանրամասներ, նախատեսվում է գրասենյակային հաջորդ բանակցությունների անցկացումը: Ըստ ՀԱՊԿ-ի գլխավոր քարտուղարի` կայանալիք զորավարժություններին մտադիր են մասնակցել ԱԱՀՈՒ-ի բոլոր անդամ երկրները, սակայն տարբեր ձեւաչափերով: Բորդյուժան նաեւ հայտնել է, որ ՀԱԽ-ի վերջին նիստի ժամանակ Հայաստանի նախագահ Սերժ Սարգսյանը պաշտոնապես հրավիրել է գործընկերներին հետեւելու զորավարժություններին:
ՀԱՊԿ-ի գլխավոր քարտուղարը հատկապես ընդգծել է զորավարժություններին հայկական կողմի ակտիվ նախապատրաստությունը: «Կան որոշ կազմակերպչական հարցեր, դրանք լուծվում են: Մեծ աշխատանք է տարվել զորավարժությունների վայրի, ուսումնական կենտրոնի պատրաստման առումով», - նշել է Նիկոլայ Բորդյուժան:
