Երեւանում ընթացող «Բազմազանության շքերթ» անվանումը կրող երթի ընթացքում, Նկարիչների միության մոտից ոստիկական մեքենայով բաժանմունք են տարան մի երիտասարդի, ով հայհոյել էր լրագրողներից մեկին: Այդ երիտասարդը մեկն էր իրենց հայրենասեր համարող խմբից, ովքեր ողջ երթի ընթացքում խոչընդոտում էին ակցիայի անցկացմանը` անվայելուչ արտահայտություններ, վիրավորանքներ եւ հայհոյանքներ տեղալով ակցիայի մասնակիցների հասցեին: Նրանք ակցիայի մասնակիցներին անվանել են «գոմիկներ», հայտարարելով, նրանք խայտառակում են ազգը:
Ինչպես ակցիայի վայրից հայտնում է NEWS.am-ի թղթակիցը, մինչ այդ երիտասարդները Նկարիչների միության առաջ երգում, բացականչում էին, ակցիայի կազմակերպիչ հ/կ-ների ներկայացուցիչները մասնակցում էին շենքի ներսում կազմակերպված ցուցահանդեսին (ֆոտոռեպորտաժ):
Լրագրողների հետ զրույցում, ակցիային խոչընդոտող երիտասարդները նշեցին, որ եթե Աստված ստեղծել է կին եւ տղամարդ, իրենք իրավունք չունեն սիրելու նույն սեռին: «Սխալ է, ոչ հայեցի, ոչ քրիստոնեական, երբ տղան սիրում է տղայի, աղջիկն` աղջկա, քանի որ այդ դեպքում վտանգվում է ազգի ապագան: Եթե այդպես են իրենք իրար սիրում, ապա ինչպես պետք է երեխաներ ունենան»,-ասացին նրանք:
Հ/կ-ների ներկայացուցիչները, խուսափելով լարվածությունից, հետնամուտքով հեռացան ցուցահանդեսից:
Ակցիայի մասնակիցներից Մարո Մարկոսյանը լրագրողների հետ զրույցում նշեց, որ իրենք խաղաղ ակցիա են անցկացնում, մինչդեռ այդ խումբը եկել եւ բռնություն է գործադրում իրենց վրա: Այդուհանդերձ, ըստ Մարկոսյանի, իրենք ամեն տարի պատրաստ են նման ակցիա անցկացնել: Նա դատապարտեց այդ երիտասարդների պահվածքը եւ ակցիայի ժամանակ զանազան հարձակումներն իրենց թեւի ներկայացուցիչների վրա:
Ավելի վաղ NEWS.am-ը հայտնել էր, որ ողջ երթի ընթացքում պահպանվել է լարված մթնոլորտը, քանի որ երիտասարդները անվայելուչ եւ վիրավորական արտահայտություններ եւ հայհոյանքներ են թույլ տվել «Բազնազանության շքերթ»-ի մասնակից ակտիվիստների հասցեին: Ակցիային խոչընդոտող երիտասարդները ակցիայի մասնակիցներին անվանել են «գոմիկներ», հայտարարելով, թե «Դուք հայ չեք»:
«Բազմազանության շքերթի» ընթացքում բախում է տեղի ունեցել ոստիկանների եւ երթի ընթացքը խոչընդոտող մի խումբ երիտասարդների միջեւ: Վերջիններս Նկարիչների միության դիմաց շղթա են կազմել, թույլ չտալով երթի մասնակիցներին մուտք գործել Նկարիչների միություն, որտեղ ցուցահանդես է ընթանում:
Ոստիկանները բացել են ճանապարհը եւ ակցիայի մասնակիցներն անարգել մտել են ներս:
Նշենք, որ «Բազմազանության շքերթի» անցկացումով մեկնարկում է «Բազմազանության շաբաթը», որի ժամանակ տեղի կունենան բազմաթիվ միջոցառումներ: Միջոցառման կազմակերպիչները հայտարարում են, որ իրենց ակցիան առնչություն չունի նույնասեռականների հետ:
«Թեեւ հայաստանյան հասարակությունը բավականին միատարր է, Հայաստանում են բնակվում նաեւ մարդիկ, ովքեր տարբերվում են մեծամասնությունից սեփական գաղափարներով, աշխարհայացքով, կրոնական եւ ազգային պատկանելությամբ, արտաքին տեսքով, նախընտրություններով եւ այլ անձնային առանձնահատկություններով»,-ասված է կազմակերպիչների հայտարարության մեջ:
Լուսանկարը` Սոնա Բարսեղյանի