«Առավոտը» զրուցել է թիվ 18 ընտրատարածքից պատգամավոր ընտրված անկուսակցական, ՀՅԴ-ի կողմից առաջադրված Արայիկ Գրիգորյանի հետ:
Պարոն Գրիգորյան, թիվ 18 ընտրատարածքում Դուք հավաքել եք 32 հազար ձայն՝ ամենաշատը բոլոր մեծամասնական թեկնածուներից: Ձեզ առաջադրել էր ՀՅ Դաշնակցությունը, բայց ՀՀ նախագահը հայտարարեց, որ Հանրապետականը նույնպես սատարում է Ձեզ: Ազգային ժողովում ի՞նչ կեցվածք եք որդեգրելու:
Ես անկուսակցական եմ եւ խորհրդարանում լինելու եմ անկախ պատգամավոր: Որեւէ խմբակցության մեջ չեմ մտնելու:
Շնորհակալ եմ եւ Դաշնակցությանը, որ իմ թեկնածությունը առաջադրեց, եւ ՀՀ նախագահին, որն աջակցեց ինձ: Շնորհակալ եմ հատկապես իմ ընտրողներին: Ընտրատարածքում իրական մրցակցություն կար, ինչն էլ ստիպեց մեր թիմին ավելի կազմակերպված աշխատել եւ մոտ 3 անգամ ավելի ձայն հավաքել, քան երկրորդ տեղը գրաված թեկնածուն:
Բնականաբար, ժողովրդի այսպիսի վստահությունը պարտավորեցնող է: Խորհրդարանում հիմնականում կհամագործակցեմ Հանրապետական խմբակցության հետ:
Վստահ եմ՝ կլինեն նաեւ հարցեր, երբ իմ մոտեցումները կհամընկնեն Դաշնակցության հետ: Այդ կուսակցությունում շատերն իմ ընկերներն ու բարեկամներն են եւ միասին երկար ճանապարհ ենք անցել:
