ԼՂՀ մայրաքաղաք Ստեփանակերտում կայացած զորահանդեսն անցկացվել էր Պաշտպանության բանակի կողմից: Ոչ միայն դե-ֆակտո գոյություն ունեցող բանակի, այլ հաղթած բանակի կողմից, որը հակառակորդին խաղաղություն էր պարտադրել:
Այս մասին NEWS.am-ի թղթակցին ասաց ռազմական փորձագետ Դավիթ Ջամալյանը` մեկնաբանելով նշված զորահանդեսի կապակցությամբ ՄԱԿ դիմելու մասին ադրբեջանական ԶԼՄ-ների տեղեկությունները:
Միաժամանակ, փորձագետն ընդգծեց, որ Հայաստանը ԼՂՀ ժողովրդի անվտանգության երաշխավորն է: «Արցախը երիտասարդ, դինամիկ զարգացող պետություն է: Երկու հայկական պետությունների միջեւ համագործակցությունը զարգանում է բարձր մակարդակով», -նշեց փորձագետը` ավելացնելով, որ հարաբերությունների մակարդակը ենթադրում էր զորհանդեսին Հայաստանի նախագահի եւ պաշտապանության նախարարի մասնակցության հրավեր:
Միաժամանակ, Ջամալյանը նշեց, որ Հայաստանն ու Լեռնային Ղարաբաղը պետք է հանգիստ վերաբերվեն «խանդի եւ նախանձի» նման դրսեւորումներին եւ զուսպ դիվանագիտական պատասխան տան: