Բնակարանների առք ու վաճառքով մայրաքաղաքն առաջատար տեղ է զբաղեցնում երկրում` անհամեմատ գերազանցելով մարզերին: Ընթացիկ տարվա առաջին եռամսյակում բնակարանների առք ու վաճառքի գործարքների թիվը, նախորդ տարվա նույն ժամանակահատվածի համեմատ, նվազել է 7,6%-ով:
Հասկանալի է, որ գործարքների կրճատումն ավելի շուտ վկայում է բնակարանների նկատմամբ գնման պահանջարկի նվազման, ոչ թե առաջարկի սահմանափակման մասին: Հատկապես որ բնակարանների գների նավազումն ուղղակիորեն հաստատում է առաջին ենթադրությունը:
Ընթացիկ տարվա մարտին Երեւանում 1 քմ բնակելի տարածքի միջին շուկայական գինը նվազել է 7,8 հազ. դրամով կամ 3,0%-ով: Ընդ որում` ամենամեծ անկումը գրանցվել է մայրաքաղաքի «Կենտրոն» վարչական շրջանում: Ինչպես հայտնի է, այդ շրջանում բնակարանների գներն աչքի են ընկնում շարքային քաղաքացիների համար ֆանտաստիկ արժեքով:
Բայց իրավիճակը կարծես փոխվում է: Ընթացիկ տարվա մարտին «Կենտրոնում» բնակելի տարածքի 1 քմ-ի արժեքը նվազել է 51,6 հազ. դրամով կամ 11,4%-ով:
Դոլարային համարժեքով հաշվարկելիս` պետք է հաշվի առնել մեկ այլ ոչ պակաս կարեւոր հանգամանք: Հայաստանում մեկ տարվա ընթացքում դոլարը դրամի նկատմամբ ամրապնդվել է 5,6%-ով: Այդ իսկ պատճառով դոլարով հաշվարկելիս բնակարանների գներն ավելի են նվազել, քան դրամի պարագայում: Այսինքն, դոլարով բնակարաններ գնողներն ավելի են շահում:
Այսպիսով, տարվա ընթացքում Երեւանում ատանդարտ չափի (63,1 քմ տարածքով) բնակարանի միջին շուկայական գինը կրճատվել է 3,6 հազար դոլարով: Ընդ որում` դոլարի փոխարժեքի փոփոխության դեպքում գնորդի համար տնտեսումը կկազմի 2,3 հազ. դոլար:
Վերադառնալով էլիտար կենտրոնին` նկատենք, որ այդ շրջանի համար գների նազումը պարզապես ֆենոմենալ է: Ստանդարտ չափի բնակարանի գինը նվազել է 12,5 հազար դոլարով` մարտին կազմելով 65 հազ. դոլար:
Միաժամանակ նշենք, որ մայրաքաղաքի չորս շրջաներում` Նոր Նորք, Ավան, Աջափնյակ եւ Մալաթիա- Սեբաստյա, բնակարանների գների չնչին աճ է գրանցվել` մինչեւ 2,1%:
Ըստ ամենայնի, գնումների մտադրության մեջ տեղաշարժեր են տեղի ունեցել, եւ պահանջարկի մի մասը թանկարժեք «Կենտրոնից» եւ «Արաբկիրից» տեղափոխվել է դեպի արվարձանների առավել ընդունելի գներով բանակարանները:
Ալբերտ Խաչատրյան