ՌԴ նախագահ Վլադիմիր Պուտինի աշխատակազմում ստեղծված ԱՊՀ-ի, Աբխազիայի եւ Հարավային Օսիայի հետ համագործակցության նոր վարչությունը կզբաղվի ԱՊՀ երկրների կենսաթոշակային միացյալ տարածքի ստեղծմամբ: Այդ մասին «Կոմերսանտ» թերթին հայտնել է գերատեսչության ղեկավար Յուրի Վորոնինը:
Նրա խոսքով, կենսաթոշակային միացյալ տարածքը կենթադրի ԱՊՀ ցանկացած երկրում աշխատելու եւ կենսաթոշակային իրավունքների հավասար պայմանների ստեղծում:
Բացի այդ, գերատեսչությունը կզբաղվի ԱՊՀ երկրների, Աբխազիայի եւ Հարավային Օսիայի աջակցությամբ`քաղաքացիական հասարակության, ֆինանսական ենթակառույցների ինստիտուտների ձեւավորմամբ եւ այժմ «որոշակի մարդասիրական նախագծեր» է իրագործում:
Վորոնինն ընդգծել է, որ նշված երկրների հետ փոխգործակցության քաղաքական ասպեկտն արտգործնախարարության իրավասությունն է:
Բացի ԱՊՀ երկրների հետ աշխատանքից, վարչությունը կզբաղվի ներռուսական «սոցիալական օրինագծերի» դիտարկմամբ` կազմելով իր փորձագիտական եզրակացությունը դրանց վերաբերյալ:
Ինչպես ավելի վաղ հաղորդել էր NEWS.am-ը, ՌԴ նախագահ Վլադիմիր Պուտինը ԱՊՀ-ի, Աբխազիայի եւ Հարավային Օսիայի հետ սոցիալ-տնտեսական համագործակցության նոր վարչություն է ստեղծել, որը գլխավորում է Յուրի Վորոնինը:
Վարչությունը նախագահի օգնական Տատյանա Գոլիկովայի ենթակայության ներքո կգործի:
