Իսրայելի պետական վերահսկիչ Միխա Լինդենշտրաուսը հրապարակել է խիստ զեկույց 2010 թվականին «Ազատության նավատորմի» գրավման ժամանակ երկրի ռազմական եւ քաղաքական ղեկավարության գործողությունների վերաբերյալ: Նա մատնանշել է լուրջ սխալները, որոնք թույլ են տրվել վարչապետի, պաշտպանության նախարարի եւ այլ պատասխանատու անձանց կողմից:
Որոշումները կայացվել են ուշացմամբ, հաղորդում է «Ազատություն» ռադիոն:
Պետական վերահսկիչ Լինդենշտրաուսը մատնանշել է նաեւ, որ տարբեր գերատեսչություններ միմյանց հետ չեն համաձայնեցրել իրենց գործողությունները, կիրառվել են հնացած հետախուզական տվյալներ: Դա հանգեցրել է նրան, որ գրավող խումբը, որն ուղարկվել էր «Մավի Մամարու» նավ, տեղեկացված չի եղել, որ նավում եղել են զինված իսլամիստներ, ինչն էլ, իր հերթին, հանգեցրել է աննպատակ զոհերի:
Իր հերթին ազգային անվտանգության խորհրդական եւ գեներալ Յակով Ամիդրորը հայտարարել է, որ հետագա մնացած ակցիաները խոսում են այն մասին, որ հետագայում որոշումների ընդունման գործընթացն ավելի կազմակերպված եւ ճիշտ է եղել:
«Ազատության նավատորմը», որը կազմակերպվել էր պաղեստինյան ակտիվիստների կողմից, Թուրքիայից լողում էր Գազայի հատված` մտադիր լինելով անցնել այդ տարածաշրջանի իսրայելական ծովային շրջափակումը: Իսրայելական զորքերի գործողությունների հետեւանքով «Մավի Մարմարա» նավի տախտակամածում բախում էր տեղի ունեցել, զոհվել էր 9 մարդ` հիմնականում Թուրքիայի քաղաքացիներ:
