Հայաստանում ցավոք սրտի դեռեւս չեն նկարահանել կինոնկար, որն արժանի կլիներ ընդգրկվելու «Խաղարկային կինո» մրցութային անվանակարգում: Այդ մասին, այսօր` հունիսի 15-ին, մամլո ասուլիսում հայտարարել է «Ոսկե ծիրան» մրցույթի գեղարվեստական ղեկավար Միքայել Ստամբոլցյանը` պատասխանելով այն հարցին, թե ինչու խաղարկային կինոյի անվանակարգում ոչ մի հայկական կինոնկար չի մասնակցում:
«Մեկ անգամ մենք նման սխալ թույլ տվել ենք եւ մրցութային ծրագրում ընդգրկել հայկական կինոնկար, որը մրցանակակիր չդարձավ: Արդյունքում, ֆիլմի ռեժիսորը եւ նրա շրջապատն սկսեցին մեր մասին բավականին վատ բաներ խոսել` մեղադրելով, որ մենք չենք ոգեւորում հայ կինեմատոգրաֆիան»-, պատմել է նա, նշելով, սակայն, որ եթե Հայաստանում ընտրված 12 կինոնկարներին հավասար կինո նկարահանեին, ապա այն անխոս եւ ուրախությամբ կընդգրկվեր ծրագրում: Ստամբոլցյանը ցավով նշել է, որ նման կինոնկար դեռեւս չկա:
Այն հարցին, թե ի՞նչ է պակասում հայկական ֆիլմերին, Ստամբոլցյանը պատասխանել է. «Շնորհքը»:
Նշենք, որ հայ կինոն, այնուամենայնիվ, լայնորեն կներկայացվի «Հայկական համայնապատկեր» անվանակարգում:
Հիշեցնենք, որ Երեւանյան միջազգային «Ոսկե ծիրան» 9-րդ կինոփառատոնը կանցկացվի 2012 թվականի հուլիսի 8-15-ին:
Փառատոնն անցկացվում է 2004 թվականից եւ համարվում է տարածաշրջանում ամենապատվավորներից մեկը: 2010 թվականին այն արժանացել է Կինոյի, հեռուստատեսության եւ սպորտի միջազգային միության գլխավոր Ficts Plate D'honneur մրցանակին: