Լավագույն տղամարդու դերի համար օսկարի արժանացած Ժան Դյուժարդենը ոչ միայն փառքի է արժանացել, այլեւ` շահավետ առաջարկներ ստացել: Սենսացիոն եւ անկրկնելի «Արտիստը» ֆիլմում խաղացած ֆրանսիացի դերասանը բանակցություններ է վարում Red Granite Pictures եւ Appian Way ընկերությունների հետ` Մարտին Սկորսեզեի «Ուոլ Սթրիթի գայլը» ֆիլմում դերի համար:
Այդ ֆիլմը բորսայի բրոքեր Ջորդան Ֆելֆորի հուշերի էկրանավորումն է, ով 2 տարի բանտարկվել է փողերի լվացման եւ արժեթղթերի հետ կապված խաբեբայությունների համար: Գլխավոր հերոսի դերը կխաղա Լեոնարդո դի Կապրիոն: Ֆիլմում կնկարահանվեն նաեւ Ջոնա Հիլը եւ Քայլ Չենդլերը:
Ենթադրվում է, որ Դյուժարդենը կկերպավորի շվեյցարացի բանկիր Ժան-Ժակ Հանդալին, ով զբաղվում է գլխավոր հերոսի փողերի լվացմամբ:
2013 թվականին Դյուժարդենը Թիմ Ռոթի հետ կնկարահանվի ֆրանսիական լրտեսական «Մեբիուս» թրիլլերում: