News
Լրահոս
News
Ուրբաթ
Մարտ 29
Տեսնել լրահոսը

Չարենցավանից դեպի Ալափարս տանող ճանապարհի ձախ հատվածում ԽՍՀՄ տարիներից կառուցված, իսկ այժմ չգործող կաթսայատունը, որի ապամոնտաժման աշխատանքների ժամանակ հունիսի 14-ի երեկոյան մահացել էր Չարենցավանի 23-ամյա բնակիչ Հովհաննես Բաբայանը, պատկանում էր «Արմավտո» ընկերությանը, որի բաժնետերերից մեկը Կոտայքի մարզպետ Կովալենկո Շահգալդյանն է: Այս մասին NEWS.am-ի թղթակցի հետ զրույցում ասաց անձամբ մարզպետը: Կովալենկո Շահգալդյանը նշեց, որ «Արմավտո» ընկերությունը ունի մոտ 830 բաժնետեր, նա սեփականատերերից մեկն է:

Նրա խոսքով` «Արմավտոն» այդ կաթսայատունը օտարել է 2005թ եւ այն արդեն ուրիշի սեփականությունն է, պատկանում է ոմն Սահակյանին: Կոտայքի մարզպետը  հերքեց լրատվամիջոցներում տարածված տեղեկությունները, որ իրենք սեփականատերերին ասել էին, որ  ապամոնտաժումը անաղմուկ կազմակերպեն, եւ չվնասեն ծխնելույզից մոտ 50 մետր հեռու գտնվող` Շահգալդյանների ապակեպատ ջերմոցը:

Նշենք, որ լրատվամիջոցներում տեղեկություններ էին տարածվել, որ կաթսայատունը պատկանել է Կոտայքի մարզպետ Կովալենկո Շահգալդյանի ընտանիքին, որն այն 5 տարի առաջ վաճառել է: Նոր սեփականատերն այս տարիների ընթացքում վաճառել է կաթսայատան ապամոնտաժումից առաջացած շինանյութը: «Բոնուսը» եղել է կաթսայատան՝ 120 մետր երկարությամբ ծխնելույզը, որի ոչ ճիշտ ապամոնտաժումն էլ դարձավ դժբախտ պատահարի պատճառ:

«Աղյուսե ծխնելույզի շինարարական ամրանի արժեքը մոտ 250-300 հազար ԱՄՆ դոլար է: Մեր տեղեկություններով` ծխնելույզը սկզբում ցանկացել են ապամոնտաժել պայթեցման եղանակով, բայց Շահգալդյանները սեփականատիրոջը զգուշացրել են, որ ապամոնտաժումն անաղմուկ կազմակերպի, եւ որ ամենակարեւորն է` այնպես, որ չվնասվի ծխնելույզից մոտ 50 մետր հեռու գտնվող` Շահգալդյանների ապակեպատ ջերմոցը:Շահգալդյանների ջերմոցն, իհարկե, հիմա տեղում է, բայց անվտանգության կանոնները չպահպանելու եւ ոչ գրագետ ապամոնտաժման պատճառով զոհվեց 23-ամյա երիտասարդ»,-գրել էր թերթերից մեկը :

Ավելի վաղ NEWS.am-ը հայտնել էր, որ հունիսի 14-ի երեկոյան փլուզվել է Չարենցավան քաղաքի արտադրական թաղամասում տեղակայված կաթսայատան բետոնե ծխնելույզը, ինչի հետեւանքով զոհվել է Չարենցավանի բնակիչ 23-ամյա Հովհաննես Բաբայանը, ում մարմնի մի մասը, մինչ փրկարարների դեպքի վայր հասնելը, դուրս է բերվել փլատակներից: Հրշեջ֊փրկարարները եւ փրկարարները իրականացրել են Հ. Բաբայանի մարմնի չհայտնաբերված մասի որոնողական աշխատանքներ: 

Տպել
Ամենաշատ