«Եվրատեսիլ 2012»-ին առաջին տեղը գրաված Շվեդիայի ներկայացուցիչ Լորենը քննադատել է Ադրբեջանի իշխանություններին լրագրողներին հետապնդելու համար: Մասնավորապես, Facebook-ի իր էջում Լորենը անհանգստություն է հայտնել ադրբեջանցի ֆոտոլրագրող Մեհման Հուսեյնովի մահվան կապակցությամբ, որին ադրբեջանական իշխանությունները մեղադրում են ոստիկանության աշխատակիցների նկատմամբ բռնություն կիրառելու մեջ:
Ինչպես տեղեկացնում է Contact.az-ը, Լորենը նշել է, որ Մեհմանը պարզապես իր գործն էր անում`լուսաբանելով Բաքվում Եվրատեսիլի ժամանակ հանուն ազատության անցկացվող միջոցառումները: «Բաքվում ադրբեջանցի իրավապահների հետ մեր հանդիպումից հետո մենք հույս ունեինք, որ իրավիճակը նրանց համար կբարելավվի: Բայց այժմ հակառակն ենք տեսնում», - գրել է երգչուհին:
Հիշեցնենք, որ Լորենը քիչ կատարողներից մեկն էր, ով աջակցում էր «Երգիր հանուն ազատության» ակցիային, որը ադրբեջանցի ակտիվիստները կազմակերպել էին ի պաշտպանություն խոսքի ազատության եւ մարդու իրավունքների:
Dagens Nyheter-ի հետ հարցազրույցում երգչուհին հայտարարել էր, որ չի կարող աչք փակել մարդու իրավունքների ոտնահարման վրա:
Իրավապաշտպանների հետ Լորենի հանդիպումները Բաքվի իշխանությունների լուրջ վրդովմունքն էին հարուցել: Կիսաեզրափակչի օրը Ադրբեջանի նախագահի ներկայացուցիչը Եվրոպական հեռարձակման միությունից պահանջել էր արտիստներին արգելել շոուի «քաղաքականացումը»:
