Երեւանի պետական բժշկական համալսարանի նախկին ռեկտոր Դերենիկ Դումանյանը չգիտեր, որ իրեն կնշանակեն Առողջապահության նախարար: Այս մասին NEWS.am-ի թղթակից հետ զրույցում ասաց Դերենիկ Դումանյանը:
«Եթե իմանայի,ես ձեզ չէի ստի»,- ասաց նա` անդրադառնալով հարցին, թե ինչու հունիսի 2-ին NEWS.am-ի թղթակցի հետ զրույցում հերքել էր իր` նախարար նշանակվելու մասին լուրերը:
Նա նշեց, որ ամեն ինչ կանի, որ արդարացնի այդ նշանակումը:
Հարցին, թե որպես առողջապահության նորանշանակ նախարար` կադրային փոփոխություններ անելու է, թե ոչ, նա պատասխանեց. «Դժվար է ասել, ես ինքս դեմ եմ կադրային մեծաքանակ կտրուկ փոփոխություններին, որովհետեւ այնտեղ կան քաղաքացիական ծառայողներ, երկար տարիների աշխատող պրոֆեսիոնալներ, ամեն դեպքում չեմ կարող բացառել, որ մեկ-երկու մարդ, ոչ իրենց տեղում գտնվողներ, չեն աշխատի»,- ասաց նա: Իսկ թե ովքեր են իրենց տեղում չգտնվողները, ապա Դերենիկ Դումանյանն ասաց, որ կգնա, կպարզի:
Երկուշաբթի օրը առավոտյան նա պետք է լինի Առողջապահության նախարարությունում, որպեսզի ներկայացնեն կոլեկտիվին: իսկ թե որն է դրանից հետո լինելու նախարար Դումանյանի առաջին քայլը, ապա նա դժվարացավ ասել:
Ավելի վաղ NEWS.am-ի թղթակցի հետ զրույցում Դերենիկ Դումանյանը հերքել էր իր` առողջապահության նախարար նշանակվելու մասին լուրերը: Նա ասել էր, որ իրեն նման առաջարկ չի եղել, ոչ էլ նման քննարկումներ են եղել, ռեկտորի պաշտոնն իրեն ավելի հոգեհարազատ է:
Հիշեցնենք, որ «Բարգավաճ Հայաստան» կուսակցության նախագահ Գագիկ Ծառուկյանը հանդես է եկել հայտարարությամբ, որտեղ նշում է, որ ԲՀԿ-ն նպատակահարմար չի գտնում մասնակցել կոալիցիոն կառավարության ձեւավորմանը, իսկ սա նշանակում է, որ ԲՀԿ-ն նախարարական պորտֆելներ չի ունենա նոր կառավարությունում: Մինչ այս առողջապահության նախարարի պաշտոնը զբաղեցնում էր ԲՀԿ-ական Հարություն Քուշկյանը: