Հունաստանում հունիսի 17-ին կայացած խորհրդարանական ընտրությունների 99% ձայների հաշվարկի համաձայն` աջակենտրոն «Նոր ժողովրդավարությունը» առաջ է անցել ձախ ծայրահեղական «Սիրիզայից»` 29,7% -ը 27% -ի դեմ:
Դա նշանակում է, որ դեմոկրատները, որոնք հանդես էին գալիս Հունաստանին օգնության փաթեթի ԵՄ-ի համաձայնագրին հետեւելու օգտին, իրավունք են ստանում կառավարություն ձեւավորելու: Հաշվի առնելով լրացուցիչ 50 մանդատները` « Նոր ժողովրդավարությունը» «Պասոկ» շարժման սոցիալիստների հետ դաշինքում ստանում է 300-տեղանոց խորհրդարանի 162 տեղը: Մայիսի 6-ի նախորդ ընտրություններին դեմոկրատներին սոցիալիստների հետ չբավականացրեց 2 ձայն, որպեսզի նոր կառավարություն ձեւավորեին (անհրաժեշտ 151 մանդատնեից նրանք ստացել էին 149-ը), գրում է «Վեդոմոստին»:
«Նոր ժողովրդավարության» առաջնորդ եւ Հունաստանի ապագա վարչապետ Անտոնիս Սամարասն ընտրություններիի արդյունքների վերաբերյալ հայտարարել է, որ հույները քվեարկել են եվրագոտում մնալու համար: Նա կոչ է արել «ազգային փրկության» կառավարության շուտափույթ ձեւավորման, հաղորդում է BBC-ն:
«Սիրիզայի» առաջնորդ Ալեքսիս Ցիպրասն ասել է, որ իր կուսակցությունը միանում է ընդդիմությանը եւ կշարունակի պայքարը տնտեսման կոշտ միջոցների դեմ, որոնց դիմել է Հունաստանը ԵՄ-ի օգնության համար: