Հայտնի ռուս հեռուստահաղորդավարուհի Քսենիա Սոբչակին սպառնում է քրեական հետապնդում հարկերը վճարելուց խուսափելու համար, քանի որ նրա շահույթը կարող էր 10 անգամ քիչ լինել:
Ըստ ՆԳՆ-ի աղբյուրի տվյալների` իր հայտարարություններում Սոբչակը զեկուցել է 5-6 միլիոն ռուբլու տարեկան շահույթի մասին: 1միլիոն եվրո եւ 500 հազար դոլար կուտակելու համար, որն առգրավել էին նրա բնակարանի խուզարկության ժամանակ, Սոբչակին հարկավոր կլիներ 10 տարի:
Սոբչակի պաշտպանությունն իր հերթին մտադիր է քննիչների դեմ հայց ներկայացնել անձնական կյանքին խառնվելու համար: Հեռուստահաղորդավարուհին անձամբ հայտարարել է, որ ՆԳՆ-ի աղբյուրների ներկայացրած զեկույցը «հերյուրանք է եւ զեղծարարություն», գրում է «Իզվեստիան»:
Քսենիա Սոբչակի, ինչպես նաեւ այլ ընդդիմադիրների բնակարանների խուզարկությունը կատարվել էր մայիսի 6-ին Բոլոտնայա հրապարակում զանգվածային անկարգությունների գործի հետաքննության շրջանակում:
Սոբչակի բնակարանի խուզարկման ընթացքում հայտնաբերել էին 1 միլիոն եվրո եւ 480 հազարական դոլար եւ ռուբլի, որոնք եղել էին հարյուրավոր ծրարներում: Հենց այդ նույն օրը` հունիսի 11-ին, սեյֆի եւ փողերի լուսանկարները հայտնվել էին համացանցում, ինչը հարուցել էր Սոբչակի փաստաբան Հենրի Րեզնիկի զայրույթը: Նա ասել է,ր որ դա «դասային ատելության հրահրում է հարուստների նկատմամբ»:
