Հայտնի ռոք երաժիշտ եւ Black Sabbath խմբի հիմնադիրներից մեկի` Օզզի Օսբոնի ընտանիքը հայտնել է, որ նրա որդի Ջեքը հիվանդ է սկլերոզով: Ջեք Օսբորնը հայտնի է դարձել «Օսբորնների ընտանիքը» ռեալիթի-շոուից հետո, որը թողարկվում էր MTV հեռուստաալիքով` 2002-ից մինչեւ 2005 թվականը: Դրանից հետո նա աշխատել է հիմնականում որպես երաժշտական պրոդյուսեր:
26-ամյա Ջեք Օսբորնին այդ ախտորոշումն են տվել, երբ նա կորցրել է աջ աչքի տեսողության 60%-ը: Երիտասարդն այդ մասին իմացել է հայր դառնալուց երկու շաբաթ անց:
«Ես ահավոր չարացած էի եւ հուզված: Ես անընդհատ շարունակում էի մտածել, թե ինչու է դա հենց հիմա տեղի ունեցել, երբ ես վերջապես ունեմ իսկական ընտանիք եւ իմ սեփական տունը», – խոստովանել է Ջեքը հարցազրույցում:
Օսբորնը հայտարարել է, որ որոշել է պատմել այդ մասին, որպեսզի բարձրացնի հասարակության տեղեկացվածությունն այդ հիվանդության մասին: Նշենք, որ ներկայումս այդ հիվանդությունը համարվում է անբուժելի, գրում է «Նովիե իզվեստիան»:
Ցրված սկլերոզը քրոնիկական հիվանդություն է, որի ժամանակ ախտահարվում են գլխուղեղը եւ ողնուղեղը: Հիվանդների մոտ առաջանում են տարբեր տեսակի նյարդային ախտանիշներ` հոգնածություն, ժամանակավոր կուրություն, խոսքի հետ կապված դժվարություններ եւ այլն:
