Ռուս գրող-դրամատուրգ եւ հայտնի բլոգեր Էդուարդ Բաղիրովը, որը նախագահական ընտրություններին Վլադիմիր Պուտինի վստահված անձն էր, հերթական սկանդալում է հայտնվել` իր բլոգում ցանկություն հայտնելով «պատվիրել» «Էխո Մոսկվիի» լրագրող Յուլյա Լատինինային:
Բաղիրովը զայրացել էր, որ հինգերորդ հաղորդումն անընդմեջ Լատինինան նրա մասին խոսել է իրականությանը չհամապատասխանող բառերով, ապա գրել է. «Ի՞նչ անել նրա հետ: Գուցե պատվիրե՞լ, որպեսզի նրան կրակեին մուտքում, ինչպես Պոլիտկովսկայային»:
Այս խոսքերը բառացիորեն պայթեցրել են ռուսական բլոգոսֆերան, նշում է «utro.ru»-ն: Դրանից հետո գրողն անմիջապես որոշել է «ձիու քայլ» անել` զարմացած հարցնելով իր ընթերցողներից. «Ընկերներ, ձեզ մոտ ընդհանրապես բացակայո՞ւմ է ըմբռնումը: Մի՞թե դուք իսկապես կարծել եք, որ ես ի վիճակի եմ պատվիրել Լատինինային»:
Դրանով Բաղիրովը չի սահմանափակվել. «Հենց առավոտվանից լրագրողները շինեցին ինձ Լատինինային կրակելու առիթով: Երկրում այլ լուրեր չկան»:
Ինչպես ասվում է «Էխո Մոսկվիի» կայքում, ռադիոկայանի ղեկավարությունում Բագիրովի ասածը որպես կատակ չեն ընդունում, իսկ քանի որ ներողություններ չեն հետեւել, ապա ռադիոկայանը հայտարարությամբ կդիմի Քննչական հանձնաժողովին: