ՄԱԿ-ի և Արաբական պետությունների լիգայի հատուկ ներկայացուցիչ Քոֆի Աննանի պլանը ի սկզբանե դատապարտված էր ձախողման, ինչը և կատարվեց: Այս մասին NEWS.am-ի թղթակցի հետ զրույցում հայտարարել է Մերձավոր Արևելքի ինստիտուտի տնօրեն Եվգենի Սատանովսկին, մեկնաբանելով Սիրիայում ՄԱԿ-ի դիտորդական առաքելության ղեկավար գեներալ Ռոբերտ Մուդի հայտարարությունը դիտորդների աշխատանքը այս երկրում դադարեցնելու մասին: Սատանովսկու խոսքով, ոչ մի դիտորդ ոչինչ չի կարող անել Սիրիայում:
«Սիրիայում քաղաքացիական պատերազմ է, որն արդեն տեղափոխվել է ծանր շրջան: Պետք չէ զարմանալ, երբ մարդկանց զայրացած ամբոխը, որոնց հարազատներին ու մտերիմներին կոտորել են, սկսում է ձողերով ջարդել ՄԱԿ-ի ներկայացուցիչների մեքենաները, մի կազմակերպության, որն աչք է փակում ահաբեկիչների, մարդասպանների գործողությունների վրա, նաև ձգտում են հեռացնել երկրի նախագահին»,- նշեց Սատանովսկին, խոսելով տեղի բնակիչների ՄԱԿ-ի դիտորդների վրա հարձակվելու մասին: Զրուցակցի կարծիքով, դա խիստ տրամաբանական է, հատկապես եթե հաշվի առնենք, որ դիտորդները եկել են այն շրջանները, որտեղ աջակցում էին Բաշար Ասադին:
Պատասխանելով այն հարցին, ինչու է վերջին ժամանակներում հնչում քննադատություն սիրիական հակամարտության երկու կողմերի հասցեին, փորձագետը ընդգծեց, որ Սիրիայում արդեն շատ է իր մասին հայտնում «Ալ-Ղաիդան» և այլ ահաբեկչական խմբավորումներ, որոնց չի կարելի հաշվի չառնել:
«Ասադի հակառակորդները` ֆունդամենտալ իսլամիստներն են, ռադիկալները, որոնք ավելի վտանգավոր են, քան ինքը Ասադը», - նշել է Մերձավոր Արևելքի ինստիտուտի տնօրենը:
Մեծ հաշվով, փորձագետը բնութագրում է իրավիճակը Սիրիայում հետևյալ կերպ. «Ահա կա սիրիական քաղաք: Այստեղ գալիս են սուննիները և կոտորում են շիաներին: Հետո գալիս են ալավիները և կոտորում են սուննիներին: Բոլորը կոտորում են իրար: Եվ ով-ով, բայց ՄԱԿ-ի դիտորդները այստեղ չէին կարող պարզել ոչինչ», - եզրափակեց Սատանովսկին:
Ինչպես ավելի վաղ հայտնել էր NEWS.am-ը, առաքելության աշխատանքը Սիրիայում դադարեցված է երկրում բռնության էսկալացիայի պատճառով: Առաքելության ղեկավար գեներալ Ռոբերտ Մուդի խոսքերով, դիտորդների աշխատանքի դադարեցումը հանդիսանում է վերջին նախանշանը այն բանի, որ ՄԱԿ-ի հատուկ ներկայացուցիչ Քոֆի Աննանի պլանը հակամարտության խաղաղ կարգավորման ուղղությամբ չի աշխատում, քանի որ ինչպես կառավարական զորքերի, այնպես էլ ընդդիմության ներկայացուցիչները արհամարհում են զինադադարը:
