Հանրապետության հրապարակում մայիսի 4-ին կայացած ՀՀԿ-ի նախընտրական համերգ-հանրահավաքի ժամանակ փուչիկների պայթյունի հետեւանքով տուժած քաղաքացիներից հիվանդանոցում հունիսի 18-ի դրությամբ մնացել է ընդամենը 2 մարդ: Այս մասին NEWS.am-ին հայտնեցին Առողջապահության նախարարությունից:
Նրանց փոխանցմամբ` հիվանդները գտնվում են Ճառագայթային բժշկության եւ այրվածքաբանության կենտրոնում: Նրանց առողջական վիճակը լավ է, եւ առաջիկայում նրանք եւս դուրս կգրվեն հիվանդանոցից: Վերակենդանացման բաժանմունքներում հիվանդներ չկան:
Ավելի վաղ NEWS.am-ը հայտնել էր, որ մայիսի 4-ին Հանրապետական կուսակցության հանրահավաքի ժամանակ ողբերգական իրադարձություն է տեղի ունեցել: Պայթել եւ բռնկվել են հարյուրավոր փուչիկներ, որոնք գազով են լցված եղել: Հրդեհված փուչիկների հալված ռետինը լցվել է հանրահավաքի մասնակիցների վրա: Հիմնականում տուժել են բեմի մոտակայքում կանգնած հանրահավաքի մասնակիցները: Ընդհանուր առմամբ տուժել է 154 մարդ: Դրանից հետո Հայաստանի նախագահ Սերժ Սարգսյանի հանձնարարությամբ Հայաստան հրավիրված Գերմանիայի Հեյդելբերգ քաղաքի Համալսարանական կլինիկայի պլաստիկ, վերականգնողական վիրաբուժության եւ այրվածքների կենտրոնի պրոֆեսոր Ադրիան Դայգլերն վիրահատել էր փուչիկների պայթյունից տուժած 9 հիվանդի:
ԱԻՆ Փրկարարական ծառայության ղեկավարի տեղակալ Նիկոլայ Գրիգորյանը «ՌԻԱ նովոստի» գործակալությունը հայտնել էր, որ փուչիկները լցված են եղել հելիում գազով, իսկ բռնկման պատճառ կարող էր հանդիսանալ այրվող ծխախոտը:
Նշենք, սակայն, որ հելիումն իներտ գազ է, որը չի այրվում, տոքսիկ չէ, անգույն է, անհոտ եւ անհամ: Հելիումի ատոմները ոչ միայն ռեակցիայի մեջ չեն մտնում այլ քիմիական տարրերի հետ, այլեւ չեն միանում իրար հետ:
Նշենք, որ փուչիկների պայթյունի գործով դեռ քննություն է ընթանում, նորություններ չկան:
