ՀՀ ոստիկանության պետի նախկին տեղակալ, ոստիկանության ներքին զորքերի նախկին հրամանատար Գրիգոր Գրիգորյանը` Շերիֆը, որ ԲՀԿ համամասնական ցուցակի 43-րդ համարն էր եւ ներկայումս գործող պատգամավոր է, պաշտոն կստանա: Այդ մասին գրում է «Հայկական ժամանակ» թերթը:
«Գրիգորյանին բաժին է հասնելու Աժ պաշտպանության, ներքին գործերի, ազգային անվտանգության հանձնաժողովի նախագահի տեղակալի պաշտոնը: Երեկ թերթի թղթակցին հայտնի է դարձել, որ այդ հանձնաժողովի նախկին տեղակալ, ՕԵԿ-ական Իշխան Խաչատրյանը չի ցանկանում ազատել աշխատասենյակը եւ կրկին հավակնում էայդ պաշտոնին, սակայն, ԲՀԿ խմբակցության քարտուղար Նաիրա Զոհրաբյանը հայտնել է, որ ըստ Դոնթի բանաձեւի` առաջադրման իրավունքը իրենցն է, եւ իրենք այդ պաշտոնում առաջադրելու են Գ. Գրիգորյանին:
Վերջինս, հիշեցնենք, Մարտի 1-ի հանձնաժողովի նիստերից մեկի ժամանակ խոստովանել էր, որ Մարտի 1-ին ներքին զորքերի ստորաբաժանումների գործողություններն ինքն է ղեկավարել»,- գրում է «Հայկական ժամանակը»:
