Կառավարության 2012-2017թթ. ծրագիրը չի իրագործվի, բայց ոչ թե այն պատճառով, որ անիրատեսական է, այլ այն բանի համար, որ ոչ միայն կառավարությունում, այլեւ իշխանությունում այն կյանքի կոչելու ընդունակ մարդիկ չկան: Այդ մասին, այսօր` հունիսի 21-ին, մամլո ասուլիսում հայտարարել է «Ժառանգություն» կուսակցության փոխնախագահ Արմեն Մարտիրոսյանը:
Նրա խոսքով, Հայաստանում ազատ տնտեսություն չի կարող լինել, քանի որ երկրում կարծրացած է օլիգոպոլիան. «Ո՞վ պետք է բարեփոխումներ իրականացնի: Միթե իշխանության ամբողջ համակարգում ներկայացված օլիգարխներն են դա անելու: Իհարկե ոչ:
Միթե հնարավոր է զարգացնել մարդկային կապիտալը, երբ տիրող հիասթափության ոեւ սոցիալական անարդարության պայմաններում երկրից արտագաղթում են հազարավոր մարդիկ, որոնք անգամ պատերազմի ժամանակ, էլեկտրականության եւ այլնի բացակայության պայմաններում չէին ցանկանում լքել հայրենիքը: Իհարկե ոչ: Դրանք հեղափոխական բարեփոխումներ չեն, այլ ավելի շուտ` իմիտացիոն»:
Այս համատեքստում, անդրադառնալով նվազագույն աշխատավարձի կրկնակի բարձրացմանը, նա նշեց, որ դա հնարավոր է անել քաղաքական կամքի եւ ստվերային տնտեսության կրճատման դեպքում: Բացի այդ, հարկավոր է ստեղծել ոչ թե հարյուր հազար, այլ մի քանի հարյուր հազար աշխատատեղ:
Գյուղատնտեսության մասով եւս Մարտրիրոսյանը լուրջ անհանգստություն հայտնեց: «Գյուղատնտեսությանը վերաբերող հատվածում վերջին կետով նշված է ճանապարհների կառուցման հարցը, այնինչ, ըստ իս, այն պետք է առաջնային լիներ», - նշել է Մարտիրոսյանը: Նա նաեւ հավելել է, որ ներգաղթը առաջին հերթին հարվածել է գյուղերին, եւ արդեն հարց է ծագում` Հայաստանում մնացե՞լ են գյուղացիներ:
Ինչ վերաբերում է 7 տոկոսանոց տնտեսական աճին, ընդդիմադիրը նշեց, որ հաշվի առնելով բարեբեր տարին, կարելի է այդ մասին վկայող որոշակի թվեր ներկայացնել: «Սակայն հարցն այն է` արդյոք այդ աճն անդրադառնո՞ւմ է քաղաքացիների կյանքի վրա: Կարծում եմ` ոչ», - նշեց Մարտիրոսյանը:
Կառավարության ծրագրում նաեւ շատ լավ կետ կա հարկերի պարզեցման վերաբերյալ: Նա նշեց, որ այդ կետը «Ժառանգություն» կուսակցության նախընտրական ծրագրի առանցքային դրույթներից էր: «Ուրախ կլինեմ, եթե այդ կետն իրագործվի:
Կառավարության ծրագրում շատ գեղեցիկ առաջարկներ կան, սակայն ծրագիրը չի իրագործվի, եթե կառավարման համակարգը թույլ չի տալիս դա անել», - ամփոփել է Մարտիրոսյանը: