Ադրբեջանում հունիսի 21-ին ձերբակալված թալիշական «Tolishi Sado» («Թալիշի ձայնը») թերթի եւ կայքի գլխավոր խմբագիր, իրավապաշտպան Գիլալ Մամեդովը աղմկահարույց «Давай, до свидания» տեսահոլովակի հեղինակն է: Այս մասին, այսօր` հունիսի 22-ին, հաղորդել են Ռուսաստանի լրատվամիջոցները:
ՆՏՎ հեռուստաընկերությունը իր «Давай, за решетку». սուպերհիթի հեղինակը հրաժեշտ է տվել իր ազատությանը» խորագրով ռեպորտաժում նշում է, որ ձերբակալված է մի մարդ, ով աշխարհահռչակ է դարձրել թալիշական մեյխանան:
Գիլալ Մամեդովի շնորհիվ, «Ты кто такой? Давай, до свидания» արտահայտությունը թեւավոր է դարձել համարյա ամբողջ հետխորհրդային տարածքում: Այն հայտնվում էր ընդդիմության զանգվածային հանրահավաքներում, երեւում Քննչական հանձնաժողովի մոտ կազմակերպված պիկետներում եւ նույնիսկ եռման կետի էր հասցրել Տիմատի-Կիրկորով վեճը, նշում է հեռուստաընկերությունը:
Ինչպես ավելի վաղ հայտնել էր NEWS.am-ը, հունիսի 21-ին Մամեդովի մտերիմները պատմել են, որ նա տնից դուրս է եկել առավոտյան 10-ին եւ գնացել հիվանդանոց` հարազատին այցելելու: Մամեդովը ժամը 11.30-ին զանգահարել է տուն, ասելով, որ կվերադառնա 30 րոպեից: Դրանից հետո նա անհետացել է: Հեռախոսազանգերին ժամը 14.00-15.30-ին պատասխանում էր անծանոթ տղամարդու ձայնը, ով ասում էր, որ Գիլալ Մամեդովը չի կարող մոտենալ հեռախոսին, նա բժշկի մոտ է: Ժամը 15.30-ից հետո բջջայինը անջատված է եղել: ժամը 16.20-ին մոսկովյան համարից զանգին ի պատասխան (զանգում էր Գիլալ Մամեդովի եղբայրը) հայտնել են, որ Գիլալը ձերբակալված է ոստիկանության կողմից եւ ոչ մի բացատրություն չեն տվել: Միայն ժամը 17.30-ին մայրաքաղաքի ոստիկանությունում հաստատել են Մամեդովի ձերբակալությունը թմրանյութերի անօրինական պահպանության համար մեղադրանքով:
Խաղաղության եւ ժողովրդավարության ինստիտուտը դա գնահատել է որպես ճնշում քաղաքացիական ակտիվիստի վրա եւ իշխանություններից պահանջել անհապաղ ազատ արձակել Մամեդովին:
Կամակերպությունը նաեւ հիշեցնում է, որ 2008 թ. փետրվարին նույնկերպ ձերբակալվել էր «Թալիշի սադո» թերթի նախկին խմբագիր, պրոֆեսոր Նովրուզալի Մամեդովը: Հետագայում նա դատապարտվել էր 10 տարվա ազատազրկման` Իրանի օգտին լրտեսության համար եւ մահացել բանտի հիվանդանոցում` խոշտանգումների հետեւանքով: