Տվյալ պահին Ղարաբաղյան հիմնախնդրի կողմերի միջեւ լայնածավալ ռազմական գործողություններն անհնար են: Այդ մասին հայտարարել է Կարնեգիի հանուն միջազգային խաղաղության հիմնադրամի ավագ գիտաշխատող Թոմաս դե Վաալը CivilNetTV-ի հետ հարցազրույցում:
Նա ընդգծել է, որ ռազմական ուժերը գտնվում են քաղաքական լուրջ վերահսկողության ներքո, եւ թեպետ կան հրաձգության դեպքեր, սակայն զենքի գործածությունը հնարավոր է միայն քաղաքական որոշում կայացնելու դեպքում: Տվյալ պահին Ղարաբաղյան հիմնախնդրի վերսկսումը կողմերի շահերից չի բխում:Սակայն կա այն սպառնալիքը, որ 3-4 տարի անց հաշիվները կարող են փոխվել:
Նա նշել է, որ Ադրբեջանը շատ դինամիկ երկիր է` ինչպես դրական, այնպես էլ բացասական իմաստով: «Դրական է, որ Ադրբեջանը դառնում է հարուստ երկիր, եւ ուժ է ձեռք բերում որպես պետություն: Բացասական է, որ այդ երկիրը շատ խնդիրներ ունի, այդ թվում նաեւ Իրանի հետ, ինչպես նաեւ ներքին լարվածություն»,- ասել է դե Վաալը:
Նրա խոսքով, մոտակա 2-3 տարրիներին սպասվում են տարածաշրջանի բոլոր երկրների ընտրությունները: Ընտրությունները չեն կարող դառնալ հիմնախնդրի սրացման խթան, հատկապես Հայաստանի դեպքում, որն ավելի դինամիկ ներքին քաղաքականություն ունի, քան Ղարաբաղում եւ Ադրբեջանում է: