ԵԽԽՎ-ում մտահոգված են Ադրբեջանում մարդու իրավունքների իրավիճակով: Այդ մասին Ստրասբուրգում, մամլո ասուլիսում հայտարարել է ԵԽԽՎ ղեկավար Ժան Կլոդ Մինիոնը: Նա նշել է, որ Ադրբեջանում մարդու իրավունքների հետ կապված իրավիճակը քննարկվել է ԵԽԽՎ Բյուրոյի նիստում եւ կդառնա ԵԽԽՎ նստաշրջանի քննարկման թեմա:
«Կազմակերպության ցանկացած անդամ երկրում նման իրավիճակն անհանգստություն է առաջացնում եւ կքննարկվի», - ասել է նա:
Ինչ վերաբերում է զեկուցողներին հետ կանչելուն, այդ որոշումը ԵԽԽՎ-ի եւ Մոնիթորինգի հանձնաժողովի իրավունքն է, որը գլխավորում է Անդերս Հերկելը:
Պատասխանելով հարցին, թե ի՞նչ է մտադիր անել ԵԽ-ն Ադրբեջանում լրագրողների ազատության եւ քաղբանտարկյալների խնդրի լուծման համար, ԵԽԽՎ նախագահը վստահեցրել է, որ ամեն ինչ կանի լրագրողների ազատության եւ ազատ աշխատելու համար:
«Միանգամայն անընդունելի է, որ ԵԽ-ի երկրների բանտերում լրագրողներ են նստած եւ խոշտանգումների են ենթարկվում», - նշել է նա, հաղորդում է Turan-ը:
Խոսելով Ադրբեջան այցելած զեկուցող Քրիստոֆեր Շթրասերի մասին` Մինիոնը նշել է, որ հունիսի 26-ին Քրիստոֆերը մամլո ասուլիս կանցկացնի, որտեղ մանրամասն կպատմի իր առաքելության մասին: ԵԽԽՎ ղեկավարությունը նրան ամեն կերպ կաջակցի իր առջեւ դրված խնդիրների հաջող իրագործման համար: