Ստամբուլում հունիսի 26-ին նախատեսվում է Թուրքիայի եւ Ադրբեջանի միջեւ Տրանսանատոլիական գազտարի (TANAP) նախագծի վերաբերյալ միջկառավարական համաձայնագիր ստորագրել, գրում է «Նեզավիսիմայա գազետան»:
Ստորագրումը տեղի կունենա Թուրքիայի վարչապետ Ռեջեփ Թայիփ Էրդողանի եւ Ադրբեջանի նախագահ Իլհամ Ալիեւի ներկայությամբ:
Գազատարի կոնսորցիումի առեւտրային հիմնադիրներ կդառնան Ադրբեջանի պետական նավթային ընկերութունը` 80%, խողովակաշարերի թուրքական պետական Botas օպերատորը եւ թուրքական նավթային Turkiye Petrolleri AO ընկերությունը` 20%: Հետագայում կմիանան նավթագազային միջազգային այլ ընկերություններ եւս: Սպասվում է, որ նրանցից առաջինը կլինի բրիտանական BP-ն:
TANAP գազատարի երկարությունը կկազմի շուրջ 2 հազ. կմ: Այն կսկսվի Թուրքիայի արեւելքից եւ կձգվի մինչեւ Բուլղարիայի կամ Հունաստանի սահմանը: Շինարարությունը կսկսվի 2014թ. IV եռամսյակում: Նրա թողունակությունը առաջին փուլում կկազմի 16 մլրդ խմ, երկրորդում` 20 մլրդ խմ, երրորդում, հնարավոր է, տարեկան կաճի մինչեւ 24 մլրդ խմ-ի:
Գազատարի կառուցման առաջին փուլի արժեքը գնահատվում է 7–8 մլրդ դոլար: