«Ինտելեկտը հավասարության մեջ» խորագրի ներքո Հայաստանում ռուսական համայնքը եւ «Հայասա» երիտասարդական հասարակական կազմակերպությունը համատեղ կազմակերպում են շախմատի առաջնություն ազգային փոքրամասնությունների միջեւ:
«Հաշվի առնելով, որ ԱՊՀ երկրներում այս տարի առողջ ապրելակերպի տարի է, որոշեցինք մրցույթի համար ընտրել սպորտային ուղղվածությունը, տվյալ պարագայում ` շախմատը»,- այս մասին, այսօր` հունիսի 26-ին, «Ելակետ» ակումբում հայտնել է Հայաստանում ռուսական համայնքի ղեկավար Յուրի Յակովենկոն:
Նրա խոսքով, շախմատի առաջնությանը կմասնակցեն Հայաստանում գրանցված բոլոր ազգային փոքրամասնությունները: Այն տեղի կունենա երկու օր` հունիսի 30-ից հուլիսի 1-ը, որտեղ կընդգրկվեն 3 տարիքային խմբեր`8-14, 15-18 եւ 19-22:
Անդրադառնալով թեմային, «Հայասա» կազմակերպության նախագահ Սուրեն Մկրտչյանը նշել է, որ բացի շախմատի առաջնությունից կկազմակերպվի նաեւ վոլեյբոլի առաջնություն Սեւանում:
«Նմանատիպ միջոցառումները կամուրջներ են հանդիսանում Հայաստանում բնակվող ազգային փոքրամասնությունների ներկայացուցիչների համար, որոնք ծանոթանալով իրար հետ էլ ավելի են ամրացնում բարեկամական կապերը բոլոր ազգային փոքրամասնությունների միջեւ»,- ընդգծել է նա:
Նշենք, որ «Հայասա» երիտասարդական հասարակական կազմակերպության նպատակը Հայաստանի ազգային փոքրամասնությունների միավերումն է, ինչպես նաեւ միջազգային մակարդակով նրանց զարգացումն ու ինտեգրումը:
