Հայաստանի հետ «Raiffeisen Bank»-ի համագործակցությունը կարող է շարունակվել արտահանման վարկային գործակալությունների կողմից հատկացված վարկերի միջոցով: NEWS.am-ի թղթակցի հետ զրույցում նման կարծիք հայտնեց ավստրիական «Raiffeisen Bank International» -ի գլոբալ ֆինանսավորման արտահանման խմբի ղեկավար Մարտին Զիմբյուրգերը:
«Հարավային Կովկասի ֆինանսական շուկան մեծ չէ, սակայն աճող է: Ուստի տեսականորեն կարելի է մտածել Հայաստանի նման երկրներին այդպիսի մեխանիզմների միջոցով վարկավորելու մասին»,-ավելացրեց նա:
Հնարավոր գործակցության մյուս ուղղությունը արտոնյալ պայմաններով զարգացման վարկերն են: Նրանց մեկի վերաբերյալ համաձայնություն է ձեռք բերվել հունիսի 21-ին:
Նախագծի շրջանակում «Raiffeisen Bank»-ը 5 մլն եվրոյի արտոնյալ վարկ կտրամադրի Հայաստանի ֆինասների նախարարությանը` Երեւանի օպերայի եւ բալետի ազգային ակադեմիական թատրոնի շենքի վերանորագման համար:
Աշխատանքները կիրականացնի «Waagner-Biro Austria Stage Systems» ավստրիական ընկերությունը` տեղական ընկերությունների հետ: Նախագիծը մեկնարկել է 2012թ. մայիսին, այն նախատեսում է ավարտել 2013 թ. հունվարին:
