Խոշոր եղջերավոր անասունների անմշակ մորթին հանդիսանում է Հայաստանից Թուրքիա արտահանվող հիմնական ապրանքը: Ըստ մաքսային մարմինների ներկայացրած տեղեկատվության` 2012 թ. առաջին եռամսյակում Հայաստանից Թուրքիա է արտահանվել մոտ 200 հազ. դոլարի ապրանքներ, որից 104 հազ. դոլարը խոշոր եղջերավոր անասունների անմշակ մորթի է: Մոտավորապես նույն պատկերն է նաեւ նախորդ տարիներին` Հայաստանից Թուրքիա արտահանումները փոքր ծավալներ են կազմում, ու դրա կեսից ավելին անմշակ մորթի է:
Թուրքիային բաժին է ընկնում Հայաստանից արտահանվող անմշակ մորթիների մոտ 80 տոկոսից ավելին: Մեկ անասունի անմշակ մորթին արտահանվում է 4.5 դոլար մաքսային արժեքով:
Անմշակ մորթիների արտահանումը Հայաստանից պայմանավորված է կաշվի արտադրության բացակայությամբ:
Թուրքիան այնուհետ վերամշակված կաշվի մի մասն առաքում է Հայաստան, սակայն ոչ մեծ ծավալներով: Հայկական արդյունաբերությունն առայժմ նախընտրում է կաշի ներմուծել Իտալիայից:
