ՀԱՊԿ-ն, կազմակերպությունից հեռանալու Ուզբեկստանի որոշման վերաբերյալ իր դիրքորոշումը կմշակի այն բանից հետո, երբ նրա կազմում ընդգրկված երկրները իրավական գնահատական կտան: Այդ մասին հայտնել են Ռուսաստանի ԱԳՆ-ի մամլո ծառայությունից:
«Ուզբեկստանի ԱԳՆ-ն ՀԱՊԿ-ի քարտուղարությանը բողոքի նոտայով տեղեկացրել է կազմակերպության գործունեությանը իր մասնակցությունը դադարեցնելու որոշման մասին: Այժմ տրվում է Ուզբեկստանի տվյալ որոշման իրավական գնահատականը», - «ՌԻԱ Նովոստիին» հայտնել են ԱԳՆ-ից: Այդ գնահատականից ելնելով` կմշակվի անդամ-երկրների համատեղ դիրքորոշումը:
Հունիսի 28-ին հայտնի դարձավ, որ Ուզբեկստանը ՀԱՊԿ-ի քարտուղարություն կազմակերպության գործունեությանը իր մասնակցությունը դադարեցնելու որոշման մասին նոտա է ներկայացրել: Այնուհետեւ այդ տեղեկատվությունը հաստատեց ՀԱՊԿ-ի քարտուղարությունը:
Ուզբեկստանն ավելի վաղ արդեն դուրս եկել էր ՀԱՊԿ-ից. 1999թ. Տաշքենդը հրաժարվել էր երկարացնել պայմանագիրը, այնինչ 2006թ. կրկին վերականգնել էր անդամությունը:
Հավաքական անվտանգության մասին պայմանագիրը (ՀԱՊ) ստորագրվել է 1992թ. մայիսի 15-ին: Համաձայնագիրը ՀԱՊԿ անդամ ցանկացած երկրի իրավունք է տալիս ցանկացած պահի լքել կազմակերպությունը: Ուզբեկստանի անդամությունը դադարեցվելուց հետո ՀԱՊԿ-ի անդամներ են մնում Հայաստանը, Բելառուսը, Ղազախստանը, Ղրղըզստանը, Ռուսաստանը եւ Տաջիկստանը:
