Հայաստանի ԱԳ նախարար Էդվարդ Նալբանդյանն ընդունել է ԱՊՀ հարցերով Ռուսաստանի նախագահի հատուկ ներկայացուցիչ, «Ռոսսոտրուդնիչեստվո» դաշնային գործակալության ղեկավար Կոնստանտին Կոսաչեւին:
Ողջունելով հյուրին՝ Էդվարդ Նալբանդյանն ընդգծել է, որ երկու երկրների միջեւ փոխգործակցությունը զարգանում է դաշնակցային հարաբերություններին բնորոշ ակտիվ եւ կանոնավոր բարձր մակարդակի քաղաքական երկխոսության, վերելք ապրող տնտեսական, միջխորհրդարանական, ապակենտրոնացված համագործակցության, ամուր իրավապայմանագրային դաշտի առկայության պայմաններում, ինչը լավ հիմք է ծառայում հարաբերությունների առավել ամրապնդման համար: Հայաստանի արտաքին գերատեսչության ղեկավարն ընդգծել է, որ հումանիտար ոլորտում կապերի զարգացումը եւ ամրապնդումը հատուկ կարեւորություն ունեն:
Էդվարդ Նալբանդյանն ու Կոնստանտին Կոսաչեւը բովանդակալից զրույց են ունեցել Հայաստանի եւ Ռուսաստանի միջեւ դինամիկ զարգացող փոխհարաբերությունների վերաբերյալ: Քննարկվել են երկկողմ կրթական, մշակութային եւ գիտական կապերը խորացնելու, էլ ավելի ընդլայնելու ուղղությամբ ձեռնարկվելիք քայլերը:
Անդրադարձ է կատարվել ԱՊՀ շրջանակներում ընթացող համագործակցությանը: Հանդիպմանը մտքեր են փոխանակվել երկուստեք հետաքրքրություն ներկայացնող այլ թեմաների շուրջ:
