«2012թ. խորհրդարանական ընտրությունների ժամանակ ես մտադիր եմ հարց բարձրացնել, որ գործարարները չընդգրկվեն քաղաքական ուժերի համամասնական ընտրացուցակներում»,- դեկտեմբերի 24-ին կայացած մամուլի ասուլիսում հայտարարել է Հայաստանի Ազգային ժողովի նախագահ, հանրապետական Հովիկ Աբրահամյանը:
Նա ընդգծել է, որ գործարարները պետք է զբաղվեն իրենց գործով, այլ ոչ քաղաքականությամբ: «Քաղաքականությամբ զբաղվելու համար շատ խելք պետք չէ, իսկ բիզնեսով զբաղվելու համար ուղեղ է պետք: Այդ պատճառով էլ մենք պետք է բացատրենք գործարարներին, որ ավելի լավ է զբաղվեն բիզնեսով, իսկ հինգ տարով խորհրդարանում հայտնվել ցանկացողների թիվը քիչ չի լինի»,- նկատել է Աբրահամյանը: Ի դեպ, նա չի կարողացել հստակ պատասխանել՝ ինքն իրեն քաղաքական գործիչ, թե ձեռնարկատեր է համարում: «Ես լավ գլուխ եմ հանում երկուսից էլ»,- ասել է օրենսդիր մարմնի ղեկավարը: