Հայ ազգային կոնգրեսը հայտարարություն է տարածել` անդրադառնալով ազատամարտիկ, ՀԱԿ Գյումրիի կառույցի ակտիվիստ Ժորա Աթոյանի մահվան փաստին։
«2009 թվականից ի վեր Ժ. Աթոյանի դեմ գործ էր հարուցվել, իբր, կեղծ փաստաթղթեր ներկայացնելու միջոցով թոշակ ստանալու մեղադրանքով։ Մինչդեռ նրա՝ ղարաբաղյան ազատամարտին մասնակցած եւ մարտերի ընթացքում կոնտուզիա ստացած լինելը անհերքելի փաստեր են, որոնք եւ հաստատված են համապատասխան մարմինների տված փաստաթղթերով։
Իրականում ազատամարտիկ Ժ. Աթոյանի դեմ տեւական այս հետապնդումը պայմանավորված էր նրա քաղաքական հայացքներով ու կողմնորոշմամբ։ Անբարոյականության որևէ սահման չճանաչող վարչախումբը նրան անգամ զրկել էր անհրաժեշտ դեղորայք ստանալու հնարավորությունից: Վարչախմբի համար ոչինչ չարժեն նախկին հերոսները, եթե այսօր նրանք հայտնվել են հակառակ քաղաքական ճամբարներում։ Իշխանական հանցագործ այդ հետապնդումը էլ, ըստ էության, դարձավ ազատամարտիկի մահվան պատճառը»,- նշված է հայտարարության մեջ։
«Հայ Ազգային Կոնգրեսը խորապես ցավակցում է Ժ. Աթոյանի հարազատներին ու մտերիմներին եւ խստորեն դատապարտում ազատամարտիկների նկատմամբ այսօրինակ ցինիկ վերաբերմունքը»։
