Մեքսիկայի նախագահ Ֆելիպե Կալդերոնին Գինեսի ռեկորդների գրքի վկայական է հանձնվել «Կայուն լույս» ծրագրին մասնակցելու համար, որի շրջանակում բնակչությանը եւ կազմակերպություններին հատկացվել էին շուրջ 23 էներգախնայող լամպեր:
Կալդերոնը վկայականն ստացել է Մեխիկոյի զբոսայգիներից մեկում հանդիսավոր արարողության ընթացքում: «Մեքսիկացիները շատ հպարտ են, որ էներգախնայման մեր ծրագիրը էներգախնայող լամպերի շնորհիվ ճանաչվել է աշխարհում ամենածավալունը», - հայտարարել է պետության ղեկավարը:
Նրա խոսքով` ծրագրի իրականացման հաջորդ փուլը կդառնա եւս 7 միլիոն նման լամպերի բաշխումը, իսկ անվճար տեղադրված լուսային էներգախնայող սարքերի ընդհանուր թիվը առաջիկայում Մեքսիկայում կավելանա մինչեւ 46-50 միլիոնով, գրում է «ՌԻԱ Նովոստին»:
Կալդերոնը հաշվարկել է, որ այդկերպ ամեն երրորդ մեքսիկական ընտանիքը լիակատար անցում կկատարի էներգախնայող լամպերին:
Մասնագետների կանխատեսումներով` ծրագրի ավարտից հետո Մեքսիկային կհաջողվի խոշոր Կամպեչե նահանգի էլեկտրաէներգիայի սպառման կես տարվա կարիքների չափով էներգիա խնայել, իսկ մթնոլորտում ածխաթթու գազի արտանետումները կնվազեն 1,4 միլիոն տոննայով:
