Թուրքիայի արտգործնախարար Ահմեդ Դավութօղլուն ամփոփել է 2009 թվականի Թուրքիայի արտաքին քաղաքականության զարգացումները՝ այդ թվում անդրադառնալով Հայաստանի հետ ստորագրված արձանագրություններին։
Թուրքական Ihlassondakika կայքէջի փոխանցմամբ՝ Թուրքիայի արտգործնախարար Ահմեդ Դավութօղլուն կարեւորել է հարեւան երկրների հետ հարաբերությունների զարգացումը եւ այդ համատեքստում նշել. «Վրաստանի, Ադրբեջանի, Հայաստանի եւ այլ երկրների հետ բարեկամության եւ վստահության օղակ է ստեղծվելու։ Կովկասը պարուրած խնդիրները 2009 թվականին մեր երկրում ամենաշատ քննարկվող թեմաները եղան։ Հայաստանի հետ ստորագրվեց երկկողմ հարաբերությունների կարգավորման արձանագրություններ։ Մեր հեռանկարը ոչ միայն Հայաստանի հետ ստորագրված արձանագրությունների՝ այլ մյուս բոլոր „սառեցված“ արձանագրությունների առաջը բացելն է։ Ամբողջ պլատֆորմով շարունակելու ենք մեր աշխատանքը»,-նշել է Ահմեդ Դավութօղլուն եւ հավելել. «Կովկասում հաստատուն խաղաղություն է ապահովվելու։ Թուրք-ադրբեջանական եղբայրությունը կշարունակի զարգանալ „Մեկ ազգ՝ երկու պետություն“ շրջանակներում»: