Ռուսական սոցցանցերում Պետերբուրգի համար «պատմական» իրադարձությունն են քննարկում` «գեյերի եւ ուղղափառների ճակատամարտը», որը կարող է տեղի ունենալ Մադոննայի համերգի ընթացքում:
Այդ «չկայացած ճակատամարտին» իր բլոգում անդրադարձել է նաեւ հեռուստահաղորդավարուհի Քսենիա Սոբչակը:
Այնինչ միայն հայտնի է, որ մի կողմի ակտիվիստներ պատրաստվում են աջակցել փոփ-դիցուհու ելույթը եւ սեռական փոքրամասնություններին աջակցող նրա երգերի պատվին ֆլեշմոբ կազմակերպել, մյուս խմբի ակտիվիստները, հակառակը, ցանկանում են բոյկոտել երգչուհու համերգը` բողոքելով աստղի «կեղծավորության դեմ», գրում է «Ռոսբալտը»:
Գեյերի մասին օրենքի նախաձեռնող պատգամավոր Վիտալի Միլոնովը «Եդինայա Ռոսիա» կուսակցությունից, համերգին չի գա, քանի որ չի ցանկանում իրեն բարոյական տառապանքների ենթարկել:
Հիշեցնենք, փոփ երաժշտության համաշխարհային աստղ Մադոննան անչափահասների շրջանում նույնասեռականության քարոզչության արգելքի մասին պետերբուրգյան օրենքն անվանել էր «զառանցանք» եւ խոստացել օգոստոսյան համերգի ընթացքում հանդես գալ գեյերի պաշտպանությամբ: