«Դե, սպասիր» մուլտֆիլմը, որի ներքո են մեծացել խորհրդային բազմաթիվ սերունդներ, սեպտեմբերի 1-ից կցուցադրվի միայն գիշերը: Համառուսաստանյան հեռուստաընկերությունում կարծում են, որ գայլի եւ նապաստակի արկածները վնասակար են մանուկների առողջության եւ զարգացման համար, քանի որ մուլտֆիլմը «բռնության տեսարաններ» է պարունակում:
Ինչպես պարզաբանել են հեռուստաընկերությունից, մուլտֆիլմը հակասում է երեխաների պաշտպանությանն ուղղված դաշնային օրենքին, որը նախատեսված է պաշտպանել փոքրիկներին վնասակար տեղեկատվությունից: Նոր օրենքը ուժի մեջ կմտնի սեպտեմբերի 1-ից, փոխանցում է «Ռոսբալտը»:
«Մենք միայն երկու տարբերակ ունենք, կամ խախտել օրենքը, կամ ցուցադրել ուշ երեկոյան»,-հայտնել է Համառուսաստանյան հեռուստաընկերության մանկապատանեկան ծրագրերի ստուդիայի ղեկավար Տատյանա Ցիվարյովան:
«Դե սպասիրը» հայտնվել է «մեծերի համար նախատեսված» ֆիլմերի շարքում` գլխավորի հերոսի անբարոյական պահվածքի պատճառով. գայլը, որը անընդհատ գնացքի պես ծխում է, նեղացնում է երեխաներին եւ լպիրշի պես է պահում իրեն կանանց հետ:
«Դե, սպասիրից» բացի, թե ինչպիսի այլ ավանդական ժապավեններ են հայտնվել արգելքի տակ, դեռեւս հայտնի չէ: Ինտերնետում այս առումով բազմաթիվ ենթադրություններ են հայտնվել: Բլոգերներն առաջարկում են քաղաքական գործիչներին արգելել «Թոմ Սոյերի արկածները» ֆիլմի դիտումը, քանի որ այն թափառաշրջիկություն է քարոզում, ինչպես նաեւ Կոկորդիլոս Գենայի եւ Չեբուրաշկայի մասին մուլտֆիլմը, քանի որ սերիաներից մեկում նրանք համբուրվում են, ինչը կարող է նույնասեռականության քարոզ ընկալվել:
