Հայաստանի սահմանին օգոստոսի 31-ի լույս սեպտեմբերի 1-ի գիշերը ադրբեջանական կողմը պարբերաբար խախտել է հրադադարի ռեժիմը, սակայն այդ խախտումները մեծամասշտաբ բնույթ չեն կրել: Այդ մասին NEWS.am-ի թղթակցին հայտնել է Հայաստանի պաշտպանության նախարարի մամուլի քարտուղար Արծրուն Հովհաննիսյանը:
Հովհաննիսյանի խոսքով` սահմանին ուժեղացված ռեժիմ չի գործում, իսկ զորքերի զգոնությունն ավելացնելու մասին Սերժ Սարգսյանի կարգադրությունը կատարվում է:
Ինչպես NEWS.am-ին հաղորդեց ԼՂՀ Պաշտպանության բանակի մամուլի քարտուղար Սենոր Հասրաթյանը, ԼՂՀ-ի եւ Ադրբեջանի զինված ուժերի շփման գծում օգոստոսի 31-ի լույս սեպտեմբերի 1-ի գիշերը հակառակորդը քանիցս խախտել է հրադադարի ռեժիմը, սակայն այդ խախտումների արդյունքում հայկական կողմից կորուստներ չեն եղել:
Հիշեցնենք, որ Հանրապետության նախագահ Սերժ Սարգսյանը օգոստոսի 31-ին Անվտանգության խորհրդի նիստ էր հրավիրել` հայ սպա Գուրգեն Մարգարյանին քնած ժամանակ կացնահարած Ռամիլ Սաֆարովի ազատման կապակցությամբ, հրահանգել էր ուժեղացնել Զինված ուժերի զգոնությունը: