Ալիվորյան եղբայրների գործը տեղից շարժվել է: Ինչպես NEWS.am-ի թղթակցին հայտնեց Ալիվորյանների փաստաբան Զոհրաբ Գաբրիելյանը, որոշում է կայացվել մասնակի փոխհատուցման մասին` 115 հազար ռուբլի, նախնական 1 միլիոն ռուբլու փոխարեն:
Հիշեցնենք, որ խոսքը 2011 թվականի հունիսի 4-5-ի գիշերը Սանկտ Պետերբուրգի «Նատալի» սրճարանի մոտ տեղի ունեցած կռվի մասին է: Վիրավորվել էր 22-ամյա ադրբեջանցի Ֆարիդ Նահմետովը: Քրեական գործ էր հարուցվել անհայտ անձի նկատմամբ: Հունիսի 8-ին ձերբակալվել էին Գեւորգ եւ Գարիկ Ալիվորյան եղբայրները: Երիտասարդներին ոստիկանական բաժանմունքում տանջել էին, սպառնացել բռնաբարությամբ, այդպիսով Գեւորգին ստիպել էին «խոստովանական» ցուցմունք տալ: Հետո Գարիկին բաց էին թողել: Նախորդ տարվա նոյեմբերից Գեւորգն ազատ էր արձակվել հայ համայնքի հեղինակավոր անձանցից մեկի երաշխավորությամբ, դեկտեմբերի 6-ին հաստատվել էր նրա անմեղությունը:
Գեւորգ Ալիվորյանի ապօրինի ձերբակալության գործն ընկել է ստուգումների «գլոբալ ծրագրում»: Ստուգման հետեւանքով սահմանվել է, որ նախորդ որոշումն ապօրինի է եղել:
«Մենք մտադիր ենք բողոքարկել 115 հազար ռուբլի փոխհատուցման մասին որոշումը եւ պահանջում ենք 1 միլիոն: Մենք, ամենայն հավանականությամբ, կդիմենք Եվրոպական դատարան», - նշել է Գաբրիելյանը:
