Հայաստանը փաստաթղթերի ընդունման առումով ՀԱՊԿ-ի ամենաակտիվ անդամներից է: Այդ մասին այսօր` սեպտեմբերի 18-ին, Երեւանում մամուլի ասուլիսի ընթացքում հայտնել է ՀԱՊԿ-ի Խորհրդարանական վեհաժողովի անդամ Վլադիմիր Վասիլեւը:
Պատասխանելով ՀԱՊԿ-ի առկա խնդիրների մասին հարցին, ԽՎ ներկայացուցիչը նշել է, որ նման խնդիրներ կան եւ աստիճանաբար լուծվում են: Նա որպես օրինակ նշել է, որ ՀԱՊԿ-ը վերջերս չկարողացավ աևրձագանքել Ղրղըզստանի ճգնաժամային իրավիճակին` իրավական մեխանիզմի բացակայության պատճառով, թեեւ անհրաժեշտ ուժերն առկա էին:
Խնդիրները միայն ռազմական ոլորտում չեն: «Հիշեք Ռուսաստանի «թեժ ամառը», երբ հրդեհներն էին մոլեգնում: Նույնիսկ այստեղ էին սահմանը հատելիս խնդիրներ գոյանում», - նշել է Վլասեւը: Նրա խոսքով Երեւանում անցկացվող ՀԱՊԿ-ի երկրների խորհրդարանների պաշտպանության եւ անվտանգության հանձնաժողովների նախագահների համակարգող խորհրդի նիստն աննախադեպ է: Կառույցը կնպաստի պետությունների միջւ համագործակցության հիմքերը զարգացնելուն:
Հիշեցնենք, ՀԱՊԿ-ի գլխավոր քարտուղար Նիկոլայ Բորդյուժան եւ Համակարգող խորհրդի անդամները Հայաստան են ժամանել ՀԱՊԿ-ի ԱԱՀՈՒ «Փոխգործակցություն – 2012» զորավարժանքներին հետեւելու:
Լուսանկարը` Սոնա Բարսեղյանի