Բաքվում, որտեղ ՄԱԿ-ի հովանու ներոքո անցկացվում է համացանցում ազատ տեղեկատվության մասին միջազգային կոնֆերանսը, Եվրահանձնաժողովի երկու պատվիրակների համակարգիչները կոտրելու փորձ են կատարել:
Ինչպես BBC-ի ադրբեջանական ծառայությանը հայտնել է Եվրահանձնաժողովի ներկայացուցիչ Ռայան Հիթը, իր եւ գործընկերոջ համակարգիչների վրա հարձակում է կատարվել: Ըստ նրա՝ Apple-ից հաղորդագրություն է ստացվել, որ իր համակարգիչը կոտրել են:
Հիթը նշել է, որ առայժմ հայտնի չէ՝ արդյոք տվյալների արտահոսք եղել է, թե ոչ: Եվրահանձնաժողովի ներկայացուցիչը նաեւ տեղեկացրել է, որ համակարգչում գաղտնի տեղեկատվություն չի պարունակվել, իսկ գործընկերոջ համակարգիչն էլ էլեկտրոնային պաշտպանության միջոցներ ուներ, դրանից տվյալներ փախցնել հնարավոր չէր:
Ռայան Հիթը նաեւ նշել է, որ Եվրահանձնաժողովի փոխնախագահ Նիլի Քրեսը փորձել է այցելել Բաքվի բանտ, սակայն նրան թույլ չեն տվել, չնայած որ նախօրեին նախագահ Իլհամ Ալիեւը նրան խոստացել էր, որ կարող է այցելել բանտարկյալներին: