Թուրքիայի վարչապետ Ռեջեփ Թայիփ Էրդողանը շնորհավորել է քրդական «Խաղաղություն եւ ժողովրդավարություն» կուսակցության նորընտիր նախագահ Սելահաթին Դեմիրթաշին:
Թուրքական Internethaber կայքէջի փոխանցմամբ` Թուրքիայի վարչապետի ստորագրությամբ շնորհավորական ուղերձը ուղարկվել է «Խաղաղություն եւ ժողովրդավարություն» կուսակցության կենտրոնական գրասենյակ, որում մասնավորապես ասվում է. «Շնորհավորում եմ Ձեզ „Խաղաղություն եւ ժողովրդավարություն“ կուսակցության առաջին արտակարգ համագումարում կուսակցության նախագահ ընտրվելու կապակցությամբ: Ցանկանում եմ, որ Ձեր համագումարը Թուրքիայի ժողովրդավարությանը նպաստի: Ընդունեք հարգանքներս»:
NEWS.am-ը հիշեցնում է, որ փետրվարի 2-ին Անկարայի հանրապետական դատախազությունը կայծակնային արագությամբ հետաքննություն է սկսել՝ փետրվարի 1-ին քրդական «Խաղաղություն եւ ժողովրդավարություն» կուսակցության անցկացրած արտակարգ համագումարի հետ կապված։
Դատախազ Քուրսաթ Քայրալի կողմից հարուցված գործը ներառում է «ժողովրդին զինվորականությունից հեռացնելու» եւ «քաղաքական կուսակցությունների ոգուն հակառակ գործունեություն իրականացնելու», «Հանցանքը եւ հանցագործին գովերգելու» մեղադրանքները։ Գործի շրջանակներում անվտանգության ծառայությունները պահանջել են կուսակցության համագումարի ժամանակ տեսագրված կադրերը։
Հիշեցնենք, որ փետրվարի 1-ին «Խաղաղություն եւ ժողովրդավարություն» կուսակցության արտակարգ համագումարի ընթացքում չի հնչել թուրքական հիմնը, այնտեղ գովերգել են Աբդուլահ Օջալանին ու PKK-ի այլ անդամների։
Կուսակցության նախկին եւ նորընտիր ղեկավարները կոշտ քննադատության են ենթարկել թուրքական իշխանություններին` մեղադրելով նրանց քրդական հարցի լուծումը շահարկելու, եւ միաժամանակ քրդերի դեմ իրականացվող ճնշումների համար:
Ընտրության արդյունքներով` կուսակցության ղեկավար է ընտրվել Թուրքիայի խորհրդարանում Դիարբեքիրից ընտրված պատգամավոր Սելահաթին Դեմիրթաշը:
