Ըստ Gallup-ի հարցման արդյունքների` հարցված ընտրողների 66 տոկոսը նշել է, թե քվեարկելու է Սերժ Սարգսյանի օգտին: Այս մասին այսօր՝ հունվարի 29-ին, լրագրողների հետ հանդիպմանն ասաց Gallup-ի ներկայացուցիչ դոկտոր Ռասա Ալիշաուսկենեն՝ ներկայացնելով «ArmNews» հեռուստաընկերության Baltic Surveys/Gallup Organization-ի եւ Հայկական սոցիոլոգիական ասոցիացիայի կողմից անցկացված «Հայ ընտրողների տրամադրվածությունը Նախագահական ընտրություններից առաջ-2013» նախագծի երկրորդ հարցման արդյունքները:
Հարցված ընտրողների 10 տոկոսը ասել է, թե քվեարկելու է Րաֆֆի Հովհաննիսյանի օգտին, 4-ական տոկոս՝ Պարույր Հայրիկյանի եւ Հրանտ Բագրատյանի օգտին, 1 տոկոս՝ Արամ Հարությունյանի օգտին: Անդրիաս Ղուկասյանին, Արման Մելիքյանին եւ Վարդան Սեդրակյանին աջակցում են ավելի քիչ, քան 1 տոկոս յուրաքանչյուրի օգտին: Հարցվածների 16 տոկոսը դեռ չի որոշել, թե որ թեկնածուին կաջակցի:
Gallup-ի ներկայացուցիչ, դոկտոր Ռասա Ալիշաուսկենեն նշեց, որ, ընտրություններին մասնակցելու համար առաջադրելով սեփական թեկնածուի, եւ ՀՀԿ-ն, եւ «Ժառանգությունը» մեծացրել են իրենց աջակիցների բազան, մինչդեռ «Բարգավաճ Հայաստանը» կորցրել է իր ընտրազանգվածի որոշակի աջակցությունը՝ այս ընտրություններում սեփական թեկնածու չունենալու պատճառով:
Gallup-ի ներկայացուցչի խոսքով` երկրորդ հարցումը հաստատեց, որ պաշտոնական քարոզարշավի ժամանակ հեռուստատեսությունը Հայաստանի բնակիչների համար մնացել է քաղաքական տեղեկատվության առաջին եւ ամենակարեւոր աղբյուրը, որին հաջորդում է «բանավոր խոսքը» եւ ինտերնետը: Ինտերնետը հատկապես կարեւոր է քաղաքի երիտասարդ ընտրողների համար: