Օրերս Բեյրութից դեպի Սիրիայի Լաթաքիա հանգստավայր տանող ճանապարհին սպանվել է հալեպահայ Հակոբ Աբգարյանը: NEWS.am-ի թղթակցի հետ զրույցում Հալեպում Հայ առաքելական եկեղեցու Բերիո թեմի մամուլի քարտուղար Ժիրայր Ռեիսյանը հայտնել է, որ նա Լաթաքիա էր ուղեւորվել մեքենայով, Ջաբլե քաղաքի մոտ նրա մեքենայի ուղղությամբ կրակ է բացվել:
Ինչ վերաբերում է «Ջեբհաթ Ան Նուսրա» խմբավորման անդամների կողմից ավելի վաղ առեւանգված տասնյակ մարդկանց սպանությանը, ապա, ըստ Ռեիսյանի, զոհերի անունները դեռ հրապարակված չեն, հետեւաբար պարզ չէ՝ արդյոք նրանց մեջ հայ կա՞, թե` ոչ:
Հավելենք, որ ըստ Հայաստանի ԱԳՆ-ի տվյալների՝ ազատ է արձակվել նախորդ շաբաթ՝ հունվարի 23-ին, Դամասկոսում առեւանգված հայ Նազարեթ Չարկյանը:
