ՀՀԿ փոխնախագահ, ԿԳ նախարարի պաշտոնակատար Արմեն Աշոտյանն արձագանքել է ԱԳ նախկին նախարար, Երեւանի ավագանու ընտրություններում ԲՀԿ ցուցակը գլխավարող Վարդան Օսկանյանի ֆեյսբուքյան գրառմանը, ով նշել էր, որ Հայաստանի թիվ մեկ խնդիրը ՀՀԿ-ի քաղաքական մենաշնորհն է:
Աշոտյանը, մասնավորապես, գրել է.
«Իհարկե, յուրաքանչյուր կուսակցություն ինքն է որոշում իր տեղը Հայաստանի քաղաքական քարտեզում: Եվ Օսկանյանի կարծիքը, թեպետ անձնական է, այնունամենայնիվ տեղավորվում է նաեւ ներկուսակցական քննարկումների համատեքստում: Սակայն Վարդան Օսկանյանի այսօրվա գրառումը կրկին մի շարք հարցեր է առաջացրել:
1. Ի՞նչ քաղաքական մենաշնորհի մասին է խոսքը, եթե`
ա. Իշխանությունները ձեւավորվել են համապետական ընտրությունների արդյունքում, այնպես, ինչպես ցանկացել է ընտրողը:
բ. ՀՀ կառավարությունը կոալիցիոն է, բաղկացած երկու կուսակցություններից
գ. ԱԺ-ում ոչ իշխանական ուժերի մանդատների թիվը 53 է. շատ ավելին, քան նախորդ գումարման խորհրդարանում
դ. Նույն ԲՀԿ-ն ունի քաղաքապետեր Գյումրիում, Սիսիանում, Իջեւանում, Եղեգնաձորում, Նոր Հաճընում, Աբովյանում, Բյուրեղավանում, չհաշված մոտ հարյուր գյուղապետեր
2. Հայաստանի իշխանություններն իրականում շահագրգիռ լինելով ուժեղ ընդդիմության կայացման գործում, որքանո՞վ պետք է արհեստականորեն ստեղծեն այդպիսին կամ ուղղորդեն նման զարգացումներ:
3. Քանի՞ հոգի կմնա ԲՀԿ խմբակցությունում, եթե Օսկանյանի տեսակետը ԲՀԿ-ի ներսում դառնա որոշիչ:
4.Եվ ամենակարեւորը, ինչո՞ւ ընդդիմադիր կուսակցություն դառնալու ցանկությունը չհայտնվեց եւ չիրականացվեց այս տարվա փետրվարին, երբ նման հնարավորություն կար: Կամ ինչու դա չանել մինչեւ սեպտեմբեր, թեկուզ հրապարակային հայտարարության մակարդակով, մինչեւ ԱԺ աշնանային նստաշրջանը:
Հ.Գ. Ասեմ նաեւ, որ Օսկանյանի այսօրվա գրառումը նաեւ ԲՀԿ-ի հանդեպ հակաքարոզչություն էր, քանզի Երեւանի ավագանու գալիք ընտրություններին ընդդիմադիր կեցվածք որդեգրած եւ սուր քննադատություն հնչեցնող ուժի առաջին համարը կրկին ընդգծում է, որ իրականում ԲՀԿ-ն ընդդիմություն չէ:
Հետեւաբար ընդդիմադիր ընտրողներին մոլորեցնելու փորձը Օսկանյանի ինքնախոստովանական գրառումով ձախողվում է եւ ավելանում է իրական ընդդիմադիր կուսակցությունների հաջողության հավանականությունը»: