Լրագրողներից մեկը հարցրել թե ինչպե՞ս է Էրդողանը մեկնաբանում հիշյալ դեպքը, հաշվի առնելով, որ դա բողոքի գործողություն էր, ինչին Թուրքիայի վարչապետը պատասխանել է. «Ընկերներ, սրանք բնական բաներ են, սրանք լինելու են: Ինչքան ես իմացա, կոշիկ նետողը սիրիացի է եւ այստեղ անօրինական է գտնվում: Ավելի մանրամասն տեղի իշխանությունները մեզ հետագայում կտեղեկացնեն»: Նա նաեւ հավելել է, որ անվտանգության ծառայության հետ կապված որեւէ բացթողում չի եղել, քանի որ ինքը ամեն ինչ անձամբ տեսել է:
Նշենք, որ փետրվարի 22-ին Սեւիլիայում Էրդողանին մրցանակ հանձնելու արարողությունից հետո նրա վրա կոշիկ են նետել: Անծանոթը, «Կեցցե՛ ազատ Քուրդիստանը» բղավելով, մոտեցել է նրան եւ շպրտել կոշիկը։
Չնայած նրան, որ կոշիկն այդպես էլ վարչապետին չի դիպել, Էրդողանին հսկող անվտանգության աշխատակիցները ձերբակալել են տղամարդուն։ Վերջինս շարունակել է բղավել «Կեցցե Քուրդիստանը», ուստի անվտանգության աշխատակիցները ավելի ամուր են բռնել նրա բերանը, որ ձայն չհանի: El Pais թերթի տվյալներով, նա ազգությամբ քուրդ, Սիրիայի քաղաքացի է եղել, ով Իսպանիայում ապրում էր ապօրինի։
Կոշիկ նետելը մի շարք մահմեդական երկրներում համարվում է ծայրահեղ անբարյացկամության նշան։ Այս ժեստը համաշխարհային ճանաչում է ստացել 2008 թ. դեկտեմբերի 14-ին, երբ իրաքցի լրագրող Մունթազեր ալ Զայիդին իր երկու կոշիկները նետել էր ԱՄՆ նախագահ Ջորջ Բուշի վրա։