Այսօր՝ մայիսի 25-ին, ՀՊՏՀ մարքեթինգի եւ կարիերայի կենտրոնի եւ ՀՀ աշխատանքի եւ սոցիալական հարցերի նախարարության «Զբաղվածության պետական ծառայություն» գործակալության համատեղ նախաձեռնությամբ Հայաստանի պետական տնտեսագիտական համալսարանի բակում կազմակերպվել է աշխատանքի տոնավաճառ` շուրջ 50 գործատուների մասնակցությամբ:
ՀՊՏՀ Լրատվության եւ հասարակայնության հետ կապերի բաժնից հայտնում են, թե բացման խոսքով հանդես է եկել աշխատանքի եւ սոցիալական հարցերի նախարար Արտեմ Ասատրյանը՝ անդրադառնալով Տնտեսագիտական համալսարանի հետ գործընկերային հարաբերություններին, խոսելով նմանատիպ միջոցառումների արդյունավետությունից:
«Բուհի համար ամենակարեւորը կրթության որակի բարձրացումն է, որն անհնար է իրականացնել առանց աշխատանքի շուկայի պահանջների ուսումնասիրության ու գործատուների հետ համագործակցության»,- ողջունելով միջոցառման բոլոր մասնակիցներին ու հյուրերին` ասել է ՀՊՏՀ ռեկտոր Կորյուն Աթոյանը: Անդրադառնալով բուհ-աշխատաշուկա հարաբերություններին` ռեկտորը նշել է, որ աշխատանքի շուկային համապատասխան մասնագետներ պատրաստելու նպատակով ՀՊՏՀ-ն պետական ու մասնավոր հատվածի գործատուների հետ կնքել է համագործակցության պայմանագրեր, իրականացնում է համատեղ կրթական ծրագրեր` փորձելով պատրաստել աշխատաշուկային համապատասխան մասնագետներ: «Այսօր, այստեղ հանդիպում են գործատուն ու մեր թողարկած մասնագետը, եւ ինձ համար շատ կարեւոր է ինչպես գործատուի, այնպես էլ գործառուի գնահատականը՝ տրված մեր կրթած ուսանողին»,- ասել է Կորյուն Աթոյանը եւ հույս հայտնեց, որ այսպիսի միջոցառումները շարունակական կլինեն:
Մի քանի ժամով համալսարանի բակում հանդիպել են լավագույն գործատուները, բուհի ուսանողներն ու շրջանավարտները, ինչպես նաեւ աշխատանք փնտրող այլ անձինք: Նրանք ծանոթացել են տարբեր ընկերությունների ու կազմակերպությունների կողմից ներկայացվող թափուր կամ սպասվող աշխատատեղերին` փորձելով գտնել իրենց մասնագիտական հմտություններին համապատասխան աշխատանք: Աշխատանք փնտրողները հնարավորություն են ունեցել նաեւ ընդգրկվելու տարբեր գործատուների տվյալների բազայում` առաջիկայում աշխատանք գտնելու ակնկալիքով:
