Թուրքիայում հուլիսի 24-ի առավոտյան միաժամանակյա օպերատիվ գործողության ընթացքում ձերբակալված «Հիզբութ թահրիր» կազմակերպության ակտիվիստների հարցաքննությունները շարունակվում են։ Ակտիվիստների տներից հայտնաբերվել են քարտեզներ, որոք ունեն «Խալիֆայության սահմանները» անունը։ Այս մասին հաղորդում է թուրքական «Aksam» թերթը։
«Հիզբութ թահրիր» կազմակերպությունը ցանկանում էր Թուրքիայում ամառային սեզոնին ահաբեկչական ճամբարներ ստեղծել եւ անդամներին արտասահման ուղարկել։ Ահաբեկչության դեմ պայքարի վարչության կողմից անցկացվող հարցաքննությունը ցույց է տվել, որ այդ կազմակերպությունը ցանկացել է Ստամբուլում լուրջ ահաբեկչական գործողություն իրականացնել։ Հայտնի է դարձել, որ «Հիզբութ թահրիր» կազմակերպությունը նախատեսել էր գործողությունների երեք փուլ։ Երրորդ փուլում նախատեսում է Ջիհադի (անհավատների դեմ սրբազան պատերազմ) շրջանակներում զինված պայքար։ Անվտանգության ուժերի ձեռքն ընկած «Խալիֆայության հողերը» քարտեզի մեջ նարնջագույն գույնով ներկված են այն երկրները, որոնք պետք է մտնեն ստեղծվելիք Խալիֆայության կազմի մեջ։ Այդ երկրներն են՝ Ուկրաինան, Իսպանիան, Ղազախստանը, Հնդկաստանը, Գաբոնը, Եգիպտոսը, Մոզամբիկը, Մադագասկարը, Ինդոնեզիան եւ այլն։
Նշենք, որ «Հիզբութ Թահրիր» կազմակերպությունը ստեղծվել է 1952 թվականին, Թահիյուդին Նեբհանիի (Անկախություն կուսակցություն) կողմից: Կառույցը մի որոշ ժամանակ համագործակցել է «Մահմեդական եղբայրների» հետ, այնուհետ հանդես է եկել սեփական ռազմավարությամբ: Նրա հիմնական նպատակն է կրկին ստեղծել համաշխարհային իսլամական պետություն եւ խալիֆայություն, եւ դրա համար օգտագործում է ուսուցողական, քարոզչական մեթոդներ: