«Ես հետեւում եմ խաղաղ ցույցերի ճանապարհով Հայաստանում ժողովրդի կամքի դրսեւորմանը` տեղական եւ միջազգային նշանակության հարցերի վերաբերյալ»: Այս մասին այսօր` սեպտեմբերի 2-ին, լրագրողների հետ զրույցում հայտարարել է Հայաստանում ԱՄՆ-ի դեսպան Ջոն Հեֆերնը` գնահատելով քաղաքացիական հասարակության ակտիվությունը երկրում հրապարակայնություն ստացած խնդիրների առնչությամբ:
«Խաղաղ ցույցերը կարեւոր են երկրում ժողովրդավարության զարգացման համար: Ես ողջունում եմ բողոքի խաղաղ ցույցերի մասնակիցներին: Ցանկանում եմ գովել նաեւ Ոստիկանության աշխատակիցներին, որոնք պատշաճ կերպով են իրականացնում իրենց աշխատանքը եւ զսպվածություն են դրսեւորում ցուցարարների նկատմամբ»,- նշել է դեսպանը:
Ըստ Հեֆերնի` ցույցերի ընթացքում առանձին միջադեպեր եղել են: ԱՄՆ-ի դեսպանատունը շարունակում է ուշադիր հետեւել իրադարձությունների զարգացմանը: «Մենք շարունակում ենք սերտ համագործակցել Ոստիկանության եւ Ազգային անվտանգության ծառայության հետ` այդ բնագավառում դրական առաջընթացի հասնելու համար»: