Հայաստան-Եվրամիություն համագործակցության խորհրդի 14-րդ նիստը կկայանա երկուշաբթի օրը Բրյուսելում, հայկական պատվիրակությունը կգլխավորի արտգործնախարար Էդվարդ Նալբանդյանը: Այս մասին հայտնել են արտգործնախարարության մամուլի ծառայությունից:
Հայաստանը եւ ԵՄ-ն նոյեմբերի 29-ի Վիլնյուսի գագաթաժողովի վերջում հանդես էին եկել ասոցացման եւ խոր եւ համապարփակ ազատ առեւտրի գոտու համաձայնագրի նախաստորագրումից հրաժարվող պաշտոնական հայտարարությամբ` հաշվի առնելով Երեւանի միջազգային նոր պարտավորությունները: Հայտարարության մեջ նշվել էր Հայաստան-ԵՄ Եվրոպական հարեւանության գործողությունների ծրագիրն արդիականացնելու անհրաժեշտության վերաբերյալ կողմերի համաձայնության մասին:
Նույն օրը տեղի կունենա ԵՄ-Ադրբեջան համագործակցության խորհրդի նիստը: Նիստին նախատեսվում է քննարկել ղարաբաղյան հիմնախնդիրը, ԵՄ-ի եւ Ադրբեջանի միջեւ էներգետիկ եւ տրանսպորտային բնագավառներում համագործակցությունը, ինչպես նաեւ ԵՄ-ի օգնության ծրագրերը եւ առաջիկա համագործակցության հարցեր:
