Կալիֆորնիայի Հայլենդ քաղաքի խորհրդի անդամ Ջոդի Սքոթը Ադրբեջանի հյուպատոսության արտաքին ճնշման տակ փորձել էր չեղյալ հայտարարել Լեռնային Ղարաբաղի Բերձորի հետ քույր քաղաքներ դառնալու վերաբերյալ նախկինում կայացված միաձայն որոշումը, սակայն` ապարդյուն: Այդ մասին գրում է «Asbarez»-ը:
Նրա ջանքերին ընդդիմացել են Լարի Մաքքալոնը եւ խորհրդի մյուս անդամները, որոնք վճռականորեն պայքարել են քույրացման վերաբերյալ որոշման համար` չնայած Ադրբեջանի արտաքին միջամտության անտեղի փորձին:
Քաղաքապետը բանաձեւի նախագիծը ներկայացրել էր ԼՂՀ այցից հետո, որտեղ Բերձորում անձամբ տեսել էր մարդկանց եւ տեղական ինքնակառավարման մարմնի խաղաղության, ժողովրդավարության եւ զարգացման ձգտումը: Բանաձեւը խորհուրդը միաձայն ընդունել էր 2013թ. նոյեմբերի 26-ին, դրա օգտին քվեարկել էր նաեւ խորհրդի անդամ Ջոդի Սքոթը, սակայն հետո վերջինս փոշմանել էր` Ադրբեջանի ազդեցության տակ:
2013թ. նոյեմբերի 17-ի` Հայլենդ քաղաքի խորհրդի անդամներին ուղղված նամակում Ադրբեջանի հյուպատոսությունը քննադատել էր խորհրդի որոշումը եւ փորձել կասկած առաջացնել` Հայաստանին մեղադրելով Լաչինի (Բերձոր) ողջ բնակչության էթնիկ զտումների մեջ: Այնուամենայնիվ, Ադրբեջանի փորձն ապարդյուն էր, քանի որ խորհրդի անդամներն ավելին էին իմացել Ադրբեջանի անցյալի, ինչպես նաեւ մարդու իրավունքների ներկայիս խախտումների եւ Հայաստանի ու Լեռնային Ղարաբաղի նկատմամբ սպառնալիքների մասին:
